Siglir tar il cuntegn

Header

audio
Staziun Glion: Viafier retica tschertga anc in locatari
Or da Actualitad dals 15.05.2024. Maletg: GUBBINI ARCHITEKTEN / VIAFIER RETICA
laschar ir. Durada: 2 minutas 37 Secundas.
cuntegn

Areal da la staziun a Glion La Viafier retica tschertga anc ina locataria locala

I pudess bainprest esser uschè lunsch: Sche tut va tenor plan, po la Viafier retica entschaiver la fin da matg cun las lavurs per ils novs bajetgs da la staziun da viafier a Glion. Per gronda part èsi gia enconuschent tgi ch'ils locataris vegnan ad esser.

Tgi che va quels dis sper il kiosc da la staziun da Glion vi, vesa ils profils ch'inditgeschan l'autezza dals bajetgs planisads da la nova staziun. Var 27 meters vegn il bajetg aut ad esser. L'onn 2020 avevan la Viafier retica e la vischnanca da Glion surdà il project als architects Gubbini da Cuera, suenter che quels avevan gudagnà l'occurrenza per il project.

Bahnhofareal Ilanz
Legenda: Cun ils novs bajetgs survegn l'areal da la staziun a Glion ina nova cumparsa. Gubbini Architekten / Viafier retica

Uschia ha la Viafier retica uss inoltrà la dumonda da bajegiar per ils dus bajetgs che sa furman or da dus cubus ch'èn levamain spustads en l'autezza: In bajetg ha otg plauns e tschel quatter. En il bajetg aut vul la Viafier retica dar en locaziun spazis per biros ed abitaziuns. En il plaunterren tschertga ella, sper il spazi per l'agen diever, ina interpresa locala che pudess utilisar quest lieu central da l'entir areal. Anc n'ha ella betg chattà ina locataria adattada. La tschertga giaja vinavant, uschia Silvio Briccola, il manader da finanzas e commember da la direcziun da la Viafier retica.

Nus essan vi da mirar cun la vischnanca e la Regiun Surselva. Nus sperain da survegnir ina locataria regiunala, uschia ch'ins stat e passenta gugent ses temp al lieu.
Autur: Silvio Briccola commember da la direcziun da la Viafier retica

En il bajetg dasperas cun quatter plauns survegn il center da furmaziun in nov dachasa. Las passa 20 abitaziuns van alura sin il martgà suenter che las lavurs da construcziun han cumenzà. En uschè in lieu central na vegnia la Viafier retica betg ad avair bregias da chattar locatarias, manegia Silvio Briccola.

Sin il pli tard l'atun 2027 duess l'areal da la staziun pudair beneventar la glieud che fa diever dal traffic public e che vegn a lavurar ed abitar sin l'areal.

RTR actualitad 12:00

Artitgels legids il pli savens