«Envers la populaziun èsi in signal ch'insatge marscha en chaussa areal Maissen», declera il president communal dad Ilanz/Glion, Marcus Beer. La populaziun spetga effectivamain sin tals signals, perquai ch'ils 9 da favrer 2025 ha il pievel approvà a l'urna en quest connex in'investiziun pli gronda. A l'urna ha el approvà la dumonda da cumprar da la Repower l'areal Maissen per 5,65 milliuns francs. La midada da maun n'è betg stada dispitaivla, perquai che davent da l'entschatta ha la vischnanca communitgà daco ch'ins veglia vegnir en possess da la parcella. La finamira è da crear spazi d'abitar.
Parcella na vegn betg vendida
Il parlament e la suprastanza communala avevan proponì da far diever dal dretg da precumpra ed il pievel ha dà suatientscha a quel. Uss na dastga l'areal Maissen en l'ost da la citad da Glion betg restar memia ditg vid e liber.
Confurm a la cumpra ha la suprastanza cuntinuà cun sias preparativas da surbajegiar la parcella nr. 485 situada tranter l'hotel Eden e la riva dal Glogn. «I na dat nagina parcella en la zona da bajegiar ch'è pli centrala che quella», declera il commember dal directori da l'administraziun communala, Andreas Pfister. La documentaziun «areal Maissen» accumpogna el dapi otg onns. Andreas Pfister conferma che la suprastanza ha approvà mardi passà il concept per porscher la surfatscha als investiders. «La parcella na vegn betg vendida, mabain dada giu en il dretg da bajegiar», punctuescha Andreas Pfister. Questa cundiziun ston investurs interessads savair.
69 abitaziuns
Suenter che la suprastanza da la vischnanca Ilanz/Glion ha decis da lantschar la concurrenza d'investurs, ha ella publitgà ina documentaziun da l'areal Maissen. Tenor il fegl cun ils fatgs pon ils investiders realisar a partir da l'atun 2028 la surbajegiada tenor il plan da quartier che vala per questa zona. L'ultima proprietaria, la Repower, aveva laschà elavurar l'investura RLC da Sogn Gagl in project directiv. Quel inditgescha en tge direcziun che la surbajegiada duai ir.
Uss che l'entira planisaziun è sut tetg e lubida, definescha il plan da quartier l'utilisaziun: En tut pon ils investiders construir sis chasas cun totalmain 69 abitaziuns e spazi per servetschs e mastergn. «En il senn d’ina politica d'abitaziuns attractiva avain nus decidì da garantir sin l'areal Maissen in'utilisaziun maschadada», renda il president communal Marcus Beer attent. El manegia abitaziuns per famiglias, persunas giuvnas, senioras e seniors, persunas bain situadas finanzialmain e persunas cun damain entradas sco er emploiads che lavuran en la regiun.
Schanza creativa
Per realisar questa cundiziun tschertga la vischnanca in investur pli grond che surpiglia il timun durant realisar in project. «Igl è dentant previs che’era societads pli pitschnas pon far part dal svilup», punctuescha Andreas Pfister. Per cassas da pensiun, grondas interpresas spezialisadas u instituziuns che administreschan facultads è l'areal Maissen a Glion ina schanza. Perquai che la parcella en in lieu central, gist sper ils binaris dal traffic public e tuttina a l'ur da la citad da Glion, è pronta immediatamain.
A societads cun chapital, assicuranzas u cassas da provediment professiunal sa porscha in spazi creativ per investir daners. Ils 8 d'october 2024, cura che la dumonda da cumprar l'areal Maissen è vegnida concreta, aveva il president communal declerà en in discurs cun la FMR: «Igl è ina fitg buna chaschun cun ina gronda cuntravalur». Uss, il zercladur 2026, punctuescha Marcus Beer: «Quai è il toc filet da la citad da Glion».