La vischnanca dad Ilanz/Glion ha envidà la populaziun a discutar davart il maletg per il futur ch'ina gruppa da lavur ha sviluppà, ina uschenumnada basa normativa. Questa basa cumpiglia visiuns, missiuns e valurs communalas. Malgrà la pitschna participaziun, hai dà bler da discutar.
Pitschen interess
En tut èn radund 20 persunas vegnidas il venderdi passà en la sala da scola da Glion per discutar la basa normativa per la vischnanca Ilanz/Glion. L'expressiun «basa normativa» na para betg da motivar la populaziun.
Armin Spescha e sia equipa da l'interpresa Communicaziun.ch han survegnì l'incumbensa da la vischnanca d'elavurar las valurs e visiuns dad Ilanz/Glion ensemen cun ina gruppa da lavur che ha fatg ponderaziuns en duas sesidas.
Nus avain gia preschentà quellas visiuns a las collavuraturas ed als collavuraturs communals ed al parlament. Uss è la populaziun en roda.
Center persistent
Avant la discussiun ha Armin Spescha preschentà il cuntegn da la basa normativa e nua che la gruppa da lavur vesa il fundament communal per il svilup futur. Uschia vul Ilanz/Glion esser il center persistent e pulsant da la Surselva. «Betg mo in center, mabain il center», vul la vischnanca esser tenor il prospect che tradescha intgins detagls dal maletg futur. E quest prospect tradescha era che Ilanz/Glion vul esser in ferm lieu da sanadad, sper in ferm lieu economic e da furmaziun e «dar il tact» en quels secturs. Just il ferm lieu da sanadad e la veglia da dar il tact ha probablamain fatg dubitar ina part da la Surselva en connex cun las discussiuns dals mais passads davart l'Ospital regiunal Surselva.
Agir persistentamain
Quai dentant n'è betg stà tema da l'inscunter, mabain il fatg che la vischnanca vul, tenor explicaziuns da la gruppa da lavur, agir en il futur a moda persistenta, tant economicamain sco ecologicamain. Armin Spescha ha ina tscherta chapientscha ch'il pled persistent è in pled da moda e che quest pled è s'isà cun ils onns. «La gruppa da lavur ha discutà intensivamain ed è tuttina stada da l'avis che la persistenza saja impurtanta», ha Armin Spescha declerà.
Marcus Beer ha explitgà cun in cas concret co la persistenza definida en la basa normativa po influenzar ina decisiun. «Nus avain dubis, sch'il magasin d'ieli che sa chatta en la vischinanza da l'areal Maissen è cumpatibel cun ils plans da sviluppar quest areal sco lieu d'abitar e da viver.» Per il president communal èsi dentant impurtant per motivs economics da porscher ina alternativa per realisar in nov magasin d'ieli. «En dumonda vegnan per exempel las zonas da commerzi a Schnaus u a Rueun», ha Marcus Beer fatg chapir.
Ina vischnanca curaschusa
E la vischnanca Ilanz/Glion vul esser ina vischnanca curaschusa, sch'igl è da prender novas vias. Ella vul acceptar midadas e sviluppar soluziuns innovativas. E la vischnanca vesa la bilinguitad sco element central da la convivenza.
Nus essan il punct central biling da la Surselva e nossa cultura unescha e nossa purschida dal temp liber fa che Glion è in lieu per esser e per viver.