Cun 415 vuschs (maioritad absoluta da 333 vuschs) ha il suveran da la vischnanca da Ilanz/Glion reelegì ses president communal Marcus Beer per la perioda d'uffizi 2026 enfin 2029, scriva la vischnanca en ina communicaziun. Per il presidi n'hai betg dà ina cuntracandidatura. En tut en 249 vuschs stadas vuschs singulas. La participaziun a l'elecziun è tar 25,3%.
Passa 200 dals cedels inoltrads èn stads cedels vids u nunvalaivels, quai interpretescha Marcus Beer curt suenter sia reelecziun er sco signar da disfidanza. El n'è betg propi cuntent cun il resultat, ha el declerà envers RTR.
Jau chat donn da signalisar uschia ch'jau na sun betg la dretga persuna. Tenor mai duess'ins alura almain avair il curaschi da vegnir cun ina cuntracandidatura.
Ma ozendi tutgia quai in zic vitiers che la glieud dettia pli gugent in signal en in tschelà che far quai en furma uffiziala. Per Marcus Beer èsi cler ch'el accepta l'elecziun cun cuntanscher il pli absolut. Sche quai na fiss betg stà il cas, lura avess el retratg sia candidatura.
Suprastanza communala: tuttas e tuts reelegids
Er ils quatter suprastants en uffizi ha il suveran reelegì, ellas ed els n'han gì nagina concurrenza d'auters candidats. Il pli absolut per l'elecziun en suprastanza è tar 268 vuschs:
Martin Capeder, Duvin (senza partida), 578 vuschs
Caroline Gasser Curschellas, Glion (Il Center), 471 vuschs
Michal Hohl, Castrisch (Partida socialdemocratica), 464 vuschs
Legenda:
Glion cuntinuescha cun las medemas forzas: Martin Capeder, Caroline Gasser Curschellas, Marcus Beer, Hanspeter Bundi e Michal Hohl (da sanester).
RTR
Midadas en il parlament – 20 da 25 sezs èn occupads
Ina pli gronda midada datti en il parlament communal ch'ha 25 sezs. Là en vegnids libers 14 sezs. En tut han 20 persunas cuntanschì il pli absolut da 173 vuschs. La participaziun è stada tar 26,1%.
En tut èn 435 vuschs idas ad autras persunas. Per ils ulteriurs tschintg sezs che n'èn anc betg occupads en il parlament communal datti in segund scrutini ch'è ils 28 da settember 2025.
Analisa da Gionduri Maissen, redactur Surselva
Avrir la boxSerrar la box
La vischnanca da Glion è ina da las grondas vischnancas en Surselva cun passa 5'000 abitantas ed abitants. I duess esser pussaivel da chattar avunda persunas per pussibilitar in'elecziun ch'è era in'elecziun. Dentant n'hai ni dà a Marcus Beer ni per la suprastanza ina cuntracandidatura.
Mo per il parlament communal cun ses 25 commembers hai dà in candidat dapli che quai ch'i ha sezs. Pia pon ins dir che l'interess per la politica communala a Glion è pitschen, quai mussa era la magra participaziun a las elecziuns, perquai che mo mintga quart è ì a l'urna e quels ch'èn ids han per part dà in signal d'ina tscherta malcuntentientscha surtut al presidi communal. Da las 876 vuschs entradas èn mo 664 stadas valaivlas, 137 cedels èn stads vids e 75 nunvalaivels. Quai èn passa 200 vuschs che n'han betg dumbrà per il pli absolut. Sche quai fa senn da dar giu vid u scriver si x-in num è da sa dumandar, perquai che para manca il curaschi da sez sa metter en la bartga e diriger la vischnanca da Glion.
Che l'interess per la politica communala a Glion è pitschen han era las duas orientaziuns publicas da l'ultim temp mussà, perquai che ni il maletg directiv ni la nova constituziun communala han motivà la populaziun da vegnir a tadlar. Sche quai ha da far cun las tematicas plitost teoreticas u sche l'interess per la vischnanca è era suenter ina fusiun ch'è passa 10 onns realisada, simplamain pitschen na sa lascha betg propi dir.
Quai ch'ins po dentant dir è ch'i dat blera lavur per la suprastanza communala da Glion era per la proxima legislatura ed in dals pensums è segir era da motivar dapli la populaziun da s'engaschar politicamain ed il meglier va quai cun projects concrets.
