Siglir tar il cuntegn

Header

video
Onn da record per l'Arena Alva
Or da Telesguard dals 15.09.2022.
laschar ir. Durada: 2 minutas 29 Secundas.
cuntegn

Arena Alva Onn da record grazia a la stad extraordinaria

L’Arena Alva ha nudà cifras da record. La svieuta netta ha surpassa l’emprima giada en ils 60 onns existenza la marca da 100 milliuns francs e munta a radund 130 milliuns francs. L’effect positiv tras la pandemia ha purtà quest augment marcant e probabel restia quest resultat in singular.

L’interpresa Arena Alva è ina interpresa gronda che maina betg sulet las pendicularas cun tut lur sutgeras e runals, mabain era purschidas da gastronomia e hotellaria. Per l’interpresa che po festivar quest onn il giubileum da 60 onns èsi stà in onn da record. Suenter ina fin da la stagiun d’enviern 2020/2021 legraivla ha lura la stad 2021 procurà per cifras positivas. Las entradas primaras èn creschidas sin passa 181’038 (2020 – 172’153) e las pernottaziuns sin 78’466 (2020 – 63’928) e quai gia en cumparegliaziun cun ina stad da record, uschia ils responsabels da l’Arena Alva a la radunanza generala dals acziunaris. Er l’enviern 2020/2021 ha l’Arena Alva pudì nudar bleras entradas primaras. Cumpareglià cun auters onns saja quai il quart meglier resultat dapi ch’ins analisescha quai, uschia il CEO Markus Wolf.  

audio
Arena Alva: energia e futur
ord Actualitad dals 16.09.2022.
laschar ir. Durada: 3 minutas 53 Secundas.

Energia è in dals temas principals

Ils proxims onns vegn la staziun al Crap Sogn Gion renovada cumplainamain. Il bajetg marcant dovria il mument fitg blera energia. Ils proxims onns duai dar ina revisiun totala, cun in bajetg che collia la staziun al Crap Sogn Gion cun il hangar pli a bass. Ord dal «bulieu» marcant nua ch’il restaurant sa chatta il mument duai dar in hotel e la gastronomia duai chattar plaz en il bajetg nov planisà, uschia ils responsabels. Impurtant saja ch’ins vegnia dal consument d’energia tar il producent, uschia Markus Wolf. Perquai èsi planisà da realisar sin las surfatschas indrizs da fotovoltaica. Ina da las finamiras da l’interpresa restia da vegnir fin il 2030 neutral da CO2, ha ditg Reto Gurtner. El saja persvas ch’ins vegnia da reussir questa finamira. Per quest enviern na possian ins anc betg dar ina prognosa sch’ins po insumma ir cun skis. Ma els sajan persvas da pudair far quai, era sin naiv artifiziala ed els sajan er persvas che la purschida da las pendicularas na saja betg in product da luxus ch’ins po renunziar, mabain in impurtant garant per plazzas da lavur e impurtant per l’economia en general, uschia Markus Wolf a la radunanza generala.

Il glatscher dal Vorab è quasi svanì

Ina da las novitads main legraivlas, dasper la guerra, la crisa d’energia e la pandemia, saja la digren extrema la stad passada dal glatscher dal Vorab. La naiv saja svanida marcantamain questa stad. Quai haja manà tar novas ponderaziuns, uschia saja uss en examinaziun in project nov da pendiculara da la Fuorcla fin sin il fil dal Vorab. Quai purtass blers avantatgs, surtut sch’ins na po betg pli duvrar il glatscher per ils runals ed uschia betg nizzegiar la pista sur la Fuorcla da Sagogn fin a Lavadinas. Ma qua sajan ins anc vi da sclerir las pussaivladads, uschia ils responsabels.

RTR Telesguard 17:40

Artitgels legids il pli savens

Scrollar a sanestra Scrollar a dretga