Il project bindel ultralad per las regiuns periferas è tar la regiuns. Cusseglier guvernativ Marcus Caduff porscha sustegn dal chantun, mo la lavur ston las regiuns sezzas far.
Ozendi èsi in desideri da blers da pudair liar lur perchasa cun il bindel ultralad.
La lavur da la Swisscom per il bindel ultralad en la periferia è bloccà en l’entira Svizra, pervia da las inquisiziuns da la cumissiun da concurrenza WEKO. Quai vul dir che las regiuns ston spetgar – ni ch'ellas pon sa stentar per alternativas. Marcus Caduff è da l'avis che quest project dal bindel ultralad fiss franc stà bun da pudair far cun la Swisscom. I na saja dentant mai stà ina cundiziun, da far il project cun il pli grond provider da la Svizra. Ussa stoppian ins chattar il discurs cun autras interpresas sco per exempel la Repower, che posseda ina rait da bischlas che pudess vegnir duvrada era per la fibra da vaider per mintga perchasa.
Il project oriund dal chantun e las regiuns era, da colliar mo tscherts objects sco per exempel scolas, chasas communalas u surbajegiadas – quai possia ussa senza auter vegnir reponderà en favur da colliar tut ils bajetgs entaifer las zonas da bajegiar. Metter ils mauns en satg saja en mintga cas la strategia fallada, cumplettescha Marcus Caduff.
Regiuns
Las differentas regiuns persequiteschan diversas strategias, ed i dat propostas da regiuns che mussan co i va senza la Swisscom. Projects ch'en sin via e che vegnan examinads, che Marcus Caduff na vul dentant betg numnar. Mo Marcus Caduff è persvadì che tals projects pon daventar projects da pilot – che pon gidar ulteriuras regiuns da vesair co i po era funcziunar senza la Swisscom.
Ord l'archiv
Co vegnir ad internet svelt en las regiuns? En Grischun datti dapi l'onn 2018 in concept chantunal per bindels ultralads. Il video declera, tge che quel prevesa.
