Il sviluppader regiunal da la Surselva Rudolf Büchi è trumpà da l'agir da la cumissiun da concurrenza (WEKO) e las dretgiras. Ensemen blocheschian els il svilup digital da las regiuns periferas.
Per mai è ina rait sperta uschè impurtanta sco l'aua da baiver.
Rudolf Büchi vesa ch'in tal cas avant dretgira ed ina inquisiziun da la cumissiun da concurrenza cuzzian almain 2 onns. Quai è tenor el in lung temp per las parts da la Surselva che n'èn betg colliadas bain cun las lingias spertas. Er na possia el betg chapir che las regiuns perifericas duain sa cuntentar cun 500 Mbit/s enstagl da vair la pussaivladad sco l'ulteriura Svizra da survegnir 10 Gbit/s.
La Swisscom ha tratg vinavant la decisiun dal Tribunal administrativ federal tar il Tribunal federal. La mesira preventiva ch'ella na dastga betg lavurar vinavant vid la rait FTTH, na cuntenta betg. Quai ha per il mument dentant nagina influenza, perquai che las insquisiziuns da la WEKO van vinavant.
Sco la WEKO declera en in mail ad RTR, vala la mesira preventiva mo per las parts che pertutgan fibra da vaider fin en chasa (la rait FTTH), tut las autras pussaivladads, po la Swisscom persequitar vinavant. Quai èn la fibra da vaider fin sin la via (FTTS) e la fibra da vaider fin en cumplex sco zonas d'industria e surbajegiadas (FTTB).
