Suenter ch'ella ha gì invista en il dossier da bajegiar dumonda Helvetia Nostra ulteriurs documents che duessan cumprovar che las 40 abitaziuns dal nov resort planisà sajan integrads en in manaschi turistic. Tenor la presidenta da Helvetia Nostra, Vera Weber, stoppia la societad Ruast preschentar ils contracts cun la u las firmas che sajan en l'avegnir responsablas per il manaschi turistic cun recepziun.
La societad Ruast ha preschentà in concept da manaschi da passa 30 paginas cun la dumonda da bajegiar. Tenor quest concept fiss la firma Alpine Plus responsabla per l'organisaziun dal manaschi turistic. Sper las 40 abitaziuns en las tschintg chasas avess la firma d'organisar il spazi communabel che cumpiglia sper ina recepziun ina zona da wellness ed in «Kids Club» per ils uffants. Per Helvetia Nostra è quest concept nagin mussament ch'ils responsabels per il nov resort vegnian ad introducir in tal manaschi ch'è tenor la lescha davart las abitaziuns secundaras (LAS) ina obligaziun.
Per Marcel Friberg, confundatur da la societad Ruast è cler: Sche Helvetia Nostra dumonda gia uss il contracts cun las firmas da manaschi, lura vegn la societad a metter quels contracts sin maisa en il proxim temp. La dumonda saja l'ov u la giaglina, tge vegn l'emprim, di l'um da fatschenta. El haja gia quintà cun in u plirs recurs encunter il project. I na saja betg l'emprim project d'in resort turistic ch'el è involvì ed el enconuschia Helvetia Nostra bain. En principi fetschia l'organisaziun d'ambient sia lavur. Il project correspundia cleramain a la lescha ed i saja mo pli ina dumonda dal temp che quel vegni construì, di Marcel Friberg.
