Las taxas d'aua da la vischnanca da Breil vegnan sbassadas ed adattas tenor la decisiun dal cussegl communal dals 24 da zercladur. Il referendum ch’era vegni prendì cunter questa midada è vegnì refusà da la radunanza communala cun 38 cunter 19 vuschs. La discussiun principala è dentant stada, pertge ch’ins haja insumma midà las taxas.
Discussiun viva
La populaziun da la vischnanca da Breil è stediamain vegnida a la radunanza communala. Cun la distanza en il temp da corona e cun mascrinas era la halla quasi plaina. Che l’auzament da las taxas sveglia talas emoziuns era da quintar. La lescha è entrada en vigur gia il favrer 2019 e quai senza opposiziun. Quai saja la finala l’incumbensa da la suprastanza da far attent la populaziun sche quai dettia ina tala midada da las taxas, è stà in da plirs votums.
Elavurar ina nova lescha
La finala èn vegnidas inoltradas duas moziuns. Ina da la vart da la gruppaziun che aveva prendì il referendum, l’autra è vegnida d’in abitant da Breil. La moziun ord las retschas da las persunas ch’han inoltrà il referendum n’ha betg chattà ina maioritad.
La segunda moziun è alura vegnida approvada cleramain. Ella pretenda da crear ina cumissiun che elavurescha ina nova lescha da taxas d’aua. Surtut duai vegnir integrada la populaziun en quest process. I na saja betg simplamain da surpigliar models da leschas sco quai che autras vischnancas fetschian, è stà in dals arguments decisivs.
Cunter ils quints d’aua han 7 persunas fatg recurs
La gronda part da quests recurs èn giud maisa cun adattar ils quints a la lescha vertenta. Uschia èn ils quints vegnids sbassads tar ils recurrents, ma betg tar l’entira populaziun. Quai ha dà da discutar, ma la finala n'è il punct betg vegni tractà vinavant. Dus da quests recurs èn il mument pendents tar la Dretgira administrativa dal Grischun.
