Il punct culminant è il gieu en il liber en lieus e localitads originalas, sco p.ex. en l’ustaria Fausta Capaul, declera il president dal comité d’organisaziun Otmar Seiler. Quel duai manar las aspectaturas ed ils aspectaturs en il passà, ma tuttina far la punt en il mund actual. Uschia haja per exempel il viturin che maina la carotscha da chavals era in telefonin, di Otmar Seiler. El sa legria fitg sin l’inscenaziun che vegn manada da Annadora Friberg e da David Flepp.
In auter punct culmianant è l’exposiziun dal pictur artist Charles Flach ch’ha passentà tranter il 1881 ed il 1928 almain 28 giadas sias vacanzas en la «Fausta Capaul». Uschia ha el malegià Breil en pliras fassettas ed era blers purtrets da persunas da Breil. Ils ultims onns ha l’ustiera Fausta Capual cumprà plirs maletgs da l'artist e quels èn da vesair en l’exposiziun.
El temp dad oz plirs quitads
La finanziaziun da tut è stada ina sfida. Els hajan quasi ensemen ils 150’000 francs necessaris, ma tut saja anc betg en cassa. Els vegnian a far il pass suenter la chomma, ma el saja fitg optimistics ch’ils daners che mancan vegnan era anc ensemen, uschia Otmar Seiler. Ina autra sfida è che l’ustaria dad oz tschertga ina nova manadra. Ils possessurs èn numnadamain sa decidids da far pass pli pitschens e da surdar a tschains l’ustaria da tradiziun. Per las inscenaziuns saja tut reglà ma els sperian fitg ch’ils possessurs chattian ina successiun, pertge quai fiss betg ideal, festivar 150 onns e suenter l’ustaria che sto serrar, uschia Otmar Seiler.
L’istorgia da la Fausta Capaul è ina da success
Ina dunna giuvna da 23 onns scriva in inserat en ina gasetta grischuna cun l’annunzia da porscher dimora a giasts e quai l’onn 1873. Quai era il cumenzament dal turissem a Breil e probabel en l’entira Surselva. Fin lura na deva quai quasi nagin turissem en la regiun e cun l’inserat fa ella reclama da vegnir a Breil. Da la Fausta Capual datti nagins documents pli, ma dapi il 1880 ha l’hotel success e quai mussan ils cudeschs d’osps. En quel datti numerusas documentaziuns sur dal travasch da lez temp.
Uschia èn da chattar fastiz da persunas da quasi tut il mund ch’han fatg vacanzas en la Fausta Capaul. Il punct culminant è probabel la visita da la regina da l’Ollanda. Ma numerus scrivents, ni auters artists, alpinist e autras persunas han laschà lur fastiz en quest cudesch d’osps. Fausta Capaul mora il 1927 cun 80 onns suenter esser stada 54 onns ustiera a Breil.
Or da l'archiv:
