A chaschun da la radunanza generala da las pendicularas da Breil èn ils problems cun la liquiditad vegnì schliads. La societad Anavon ch'ha gia investì 7 milliuns francs en ils davos 10 onns ha anc ina giada dà 2 milliuns francs. Cunquai è il manaschi durant la stagiun d'enviern garantì.
Il president dal cussegl administrativ aveva pretendì da la vischnanca dapli engaschi per las pendicularas. Quest engaschi vul la vischnanca uss mussar ed ha laschà eleger en il cussegl administrativ Roman Flepp, il futur president communal, ed Adrian Bergamin, futur commember da la suprastanza.
Plinavant è il dumber da persunas en il cussegl administrativ vegnì auzà da 5 sin 7.
Bun onn dentant pauc gudogn
L'onn da gestiun 2024 saja stà in bun onn, communitgeschan la Pendicularas Breil SA. Surtut l'enviern hani pudì augmentar las frequenzas cun in plus da 9%, cumpareglià cun l'onn avant. Quai haja era gì in effect positiv sin la gastronomia. L'aura e las cundiziuns optimalas da far naiv hajan gidà che skiunzas e skiunzs sajan stads cuntents sin las pistas da Breil.
Problem finanzas: I va vi da la liquiditad
En il rapport annual decleran las pendicularas in gudogn da bun 615'000 francs avant tschains, taglia, revalitaziuns ed amortisaziuns (EBITDA). Quai è bun 8,8% pli pauc che l'onn avant cun bun 675'000 francs. Sco gudogn net – pia suenter tut las deducziuns – restan anc 1981.81 francs. Quai tar entradas da bun 6,4 milliuns ed expensas da 5,8 milliuns francs.
Nus declarain in deficit structural da 900'000 francs.
Era sch'il bun enviern haja gidà da finanziar investiziuns centralas, sco per exempel la renovaziun da l'Alp Dado, vegnian las pendicularas ad examinar da rudent la structura finanziala e las reglar danov – e quai en il decurs dals proxims mais, scrivan las pendicularas. La necessitad demussi era quest quint, scriva il president dal Cussegl d'administraziun Hansueli Baier en il rapport annual. Per avair finanzas saunas duvrassan las pendicularas in cash-flow d'almain 1,5 milliuns francs e betg 0,6 milliuns sco quest onn.
Sfidas memia grondas: Clom per ulteriur agid dal maun public
Questas sfidas finanzialas, cumbinadas cun il mantegniment dals cundrizs, ils custs per ennavar ed il clima che lascha crescher las temperaturas engrevgeschian las lavurs ed augmentian ils basegns uschè fitg ch'i na vegnia betg pli a funcziunar senza l'agid dal maun public, concluda Baier. Ils emprims discurs e pass sajan instradads.
