Las pendicularas da Breil Vuorz Andiast vulan renovar e sanar l’Alp Dado. Planisà è da renovar las garaschas per las maschinas da pista ed ils tancs per quellas, sco era l’entir manaschi da gastronomia. Uschia duai era la capacitad vegnir augmentada dad oz 700 persunas sin plaz per 900 persunas. Surtut tar la construcziun dal resort Pradas, hajan ins pudì augmentar il dumber da giasts, ma era en general saja la gastronomia sin l’Alp Dado vegnida en ils onns ed ina sanaziun è urgenta, uschia il directur da las pendicularas da Breil, Beat Zenklusen. Era energeticamain duai dar optimaziuns, planisà è da construir ina ovra solara che producescha l’enviern l’energia per l’entir manaschi sin l’Alp Dado. Per far tut quellas lavurs dovra quai investiziuns da 4,5 milliuns francs.
Chapital d’aczias vegn engrondì
La vischnanca da Breil vul cumprar ina cumpart da las aczias novas. Uschia duai la vischnanca daventar il pli grond acziunari simpel, di il president Clau Schlosser. Concret muntia quai che la cumpart da 6,2% da las aczias che la vischnanca ha uss, vegniss augmentada sin radund 25%. Quai muntass era la vusch ch’ins ha en las pendicularas, cun in represchentant en il cussegl d’administraziun ma era sco impurtant acziunari, di Schlosser. Per la vischnanca saja quai ina investiziun en il motor dal turissem, ma era en l’avegnir da la vischnanca da Breil.
Gronda impurtanza da las pendicularas ed onn da record
Las pendicularas da Breil porschan, durant l’enviern, lavur a rodund 100 persunas, quai saja fitg bler per ina vischnanca pitschna. Perquai saja quai in dals pli impurtants motors per l’economia ed in sustegn finanzial uschia era responsabel, surtut perquai ch’els possian finanziar quai senza stuair far ulteriurs debits, uschia Clau Schlosser, il president communal. Quest onn han las pendicularas da Breil nudà in onn da record cun uschè bleras frequenzas sco anc mai.
