Per las pendicularas da Breil/Vuorz/Andiast va la stagiun d'enviern a fin suenter la fin d'emna dals 21 e 22 da mars – ed uschia ina da las pli pretensiusas dals ultims onns. L'atun passà han las pendicularas gì cassas vidas – ina giada dapli han ils acziunaris principalas – la Anavon SA – stuì gidar or da las miserias finanzialas. Cun 1,5 milliuns francs ha quella lura pudì garantir il manaschi d'enviern. Far reservas n'ha dentant era quest enviern betg funcziunà, uschia che las finanzas restan vinavant in problem.
Difficultads finanzialas e las investiziuns necessarias
Plinavant stattan las pendicularas davant in problem structural: en ina stagiun da skis che cuzza be trais mais èsi grev da far bunas fatschentas. Vitiers vegn la mancanza da naiv – entras quella dovri naiv artifiziala, quai che chaschuna custs supplementars.
Tenor il president da las pendicularas Hansueli Baier è la stagiun passada stada la pli greva dals ultims onns. Davant il bancrut na sajan las pendicularas dentant betg, di il president.
L'atun passà èsi stà critic. Lura n'avevan nus betg pli pudì pajar ils quints. Quai avain nus dentant dumagnà ed uss vai ensi. Nus essan uss dentant dumandads da chattar ina soluziun per il futur.
Baier è persvadì ch'els vegnan a chattar ina soluziun. La buna veglia saja qua da tuttas varts. L'existenza da las pendicularas na saja pia betg periclitada, di el. Il futur da las pendicularas dependa dentant dal sustegn finanzial.
Investiziuns da 9 milliuns francs ils ultims 10 onns
Actualmain tutga la gronda part da als aczias a la societad Anavon che cumpiglia 22 acziunaris, tranter auter interpresas localas e possessuras e possessurs da segundas abitaziuns. Ils ultims 10 onns han ils acziunaris investì radund 9 milliuns francs per segirar il manaschi. Uss dovri dentant il sustegn da la vischnanca per garantir il futur da las pendicularas, di Baier.
Nus duvrain fitg blers daners che na vegnan betg da las bancas – lezzas na dattan a nus nagins daners. E sche jau ditg fitg bler, lura èn quai summas da milliuns da duas cifras.
Quant bleras milliuns ch'i dovra lura effectiv, dependia da las investiziuns ch'ins prendia en mira ils proxims onns per il territori da skis.
Ina opziun pussaivla saja da construir ina nova pendiculara che maina directamain da Breil sin l'Alp dado. Quai dovria dentant fitg blers daners. Ina tala pendiculara saja ina investiziun ed in project da generaziuns. Ins discurria qua da tranter 30 e 40 milliuns francs.
Senza sustegn da la vischnanca na vegni betg pli a funcziunar. Nun ch'i capita ina miracla.
Roman Flepp, il president communal da la vischnanca da Breil saja pront porscher maun per discutar il futur da las pendicularas e per chattar ina soluziun. Quai ha el ditg envers RTR. Prioritad haja uss dentant da sanar las finanzas e pir en in segund pass possian ins lura discutar davart investiziuns pli grondas.