La purschida dal traffic public è impurtanta per il svilup da las regiuns e la finala po ina tala lingia da bus era colliar regiuns. Quai è il cas cun ils bus directs sur il Pass Lucmagn che collia la Surselva cun la Val dal Blegn, il rumantsch cun il talian e la finala era il nord cun il sid. E las contractivas èn stadas lungas pertge per regla saja il cunfin dal chantun era il cunfin dals interess, accentuescha il president da la Pro Lucmagn Martin Candinas. En il cas concret da far la colliaziun eran era duas interpresas da traffic public involvidas: da la vart grischuna curseschan ils Autos da Posta fin al Pass Lucmagn, da l’autra l’interpresa pitschna Autolinee Bleniesi.
Tgi dastga charrar nua?
Sco il manader da la purschida d’Auto da Posta, Marco Lüthi ha ditg saja l’emprim stà da sclerir tgi che posseda la concessiun da charrar e da coordinar cun ils collegas da la Val dal Blegn e quai haja simplamain durà ses temp. Ma la finala hajan els chattà ina buna soluziun che cuntentia tuts. La schliaziun è simpla, duas giadas a di van ils Auto da Posta davent da la staziun da Mustér fin a Biasca ed enavos, duas giadas a di van ils bus da l’Autolinee Bleniesi da Biasca fin a Mustér ed enavos. Uss vegnian els ad observar co che la purschida vegn recepida ed alura tenor basegn po quella en concordanza cun ils chantuns vegnir schlargiada, di Marco Lüthi. Ma il mument sa legrian els simplamain ch’il giast haja dapli confort e la finala spargnia quai era temp da viadi da vegnir dal nord en il sid ni viceversa.
La Pro Lucmagn vul la colliaziun sur onn
La Pro Lucmagn ha trais finamiras. L’impurtanta è da tegnair avert il Pass dal Lucmagn durant l’enviern. In'ulteriura è da colliar las duas valladas Surselva e la Val dal Blegn – e la finala promover il traffic public. La purschida actuala hajan els persequità stretg, ed adina puspè animà las duas regenzas da far vinavant e porscher la colliaziun directa, di Martin Candinas.
La finala è la finamira era quella da pudair porscher questa colliaziun durant l’enviern.
Ma quai è era ina dumonda da la segirtad, tenor Candinas. Il chantun Grischun haja gia fatg plirs da ses pensums, per exempel cun prolungar la galaria sin il pass ed uschia schliar ina da las grondas sfidas sin la vart dal nord. Uss vegnia il chantun Tessin a far ina replantaziun d’in guaud da protecziun ed uschia pussibilitar dapli segirtad era da la vart dal sid, di Candinas. Ma fin che la colliaziun vegnia duria quai ses temp. L’emprim curs ordinari sur il pass cursescha ils 14 da zercladur 2025 e quai fin l’atun.