Siglir tar il cuntegn

Header

cuntegn

Cadi Sajettà luf problematic

Suenter plirs inscunters tranter in luf singul e persunas en territoris d'abitadi ha il chantun decidì da sajettar l'animal. La surveglianza da chatcha ha sajettà il luf en la Cadi en la notg sin ils 20 da schaner 2022.

Durant emnas haja adina puspè dà inscunters preoccupants tranter il luf singul e persunas en territoris d’abitadi. Quests inscunters sajan vegnids qualifitgads sco cumportament problematic cun ina periclitaziun potenziala da l'uman, uschia l’Uffizi da chatscha e pestga envers RTR. Il chantun haja perquai decis da sajettar l’animal. Quai sin basa da la clausula generala da la polizia.

En ina situaziun urgenta, nua ch’i dat in privel sco en quest cas, lura pon ins far diever da la clausula generala da polizia. Uschia pon ins mantegnair ina tscherta segirezza per la populaziun.
Autur: Adrian Arquint manader da l'Uffizi da chatscha

Emprovas da munir l'animal eran adumbatten

La surveglianza da chatscha aveva gia dapi in detg temp observà attentamain il svilup dals inscunters dal luf singul cun persunas. Pliras emprovas da munir l'animal cun in emettur da telemetria e d'al spaventar cun agid da ballins da gumma èn restads senza success.

audio
Adrian Arquint: «Cumportament insolt e fitg problematic»
aus Actualitad vom 21.01.2022.
abspielen. Laufzeit 6 minutas 29 Sekunden.

Il luf è suandà ad ina persuna

La dumengia passada, la damaun a las 06:15, hai pia dà in inscunter, tar il qual il luf ha suandà ina persuna senza che quella ha badà. La finala è il luf restà sur in pli lung temp cun mo dus meters distanza en vischinanza da la persuna per suenter ir vinavant en direcziun dal vitg. Tar il luf mastgel ch'è entant vegnì sajettà, sa tracti cun gronda probabilitad d'in luf singul.

L'animal è vegnì transportà per ulteriuras examinaziuns en l'institut per medischina da peschs e selvaschina a Berna. L'analisa genetica vegn fatga dal laboratori da biologia da conservaziun da l'Universitad da Losanna.

Nus lain era savair tge ch'il magun cuntegna. Ils resultats san mussar sch’il luf ha mangià pavel da chauns e giats ed è uschia sa cundiziunà da vegnir en ils abitadis
Autur: Adrian Arquint manader da l'Uffizi da chatscha

RTR novitads 11:00

Artitgels legids il pli savens

Scrollar a sanestra Scrollar a dretga