Per ella saja quai er adina in giavisch d’emprender in u dus pleds en la lingua nua ch’ella passenta las vacanzas. E perquai haja ella era vulì porscher quai qua al campadi, di Silvana Beer che maina uss la segunda stagiun il campadi a Mustér, Fontanivas. Uschia è il curs da rumantsch naschì e cunquai che Flavia Bearth, la cusrina da la manadra, ha gist terminà la scolaziun da magistra è la scolasta era stada chattada. L’onn passà eran ils curs mintgamai la gievgia saira, e la participaziun era plitost magra. Uschia hajan els empruvà in nov temp e voilà, l’emprima giada da la stagiun è la participaziun cun passa 10 persunas stada in success, di Silvana Beer.
-
Bild 1 von 4. Las participantas ed ils participants dal curs da rumantsch al campadi. Bildquelle: RTR.
-
Bild 2 von 4. Flavia Bearth e Silvana Beer. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Plirs pleds rumantschs per emprender. Bildquelle: RTR.
Inscripziuns rumantschas
La gronda part da las inscripziuns uffizialas sin il campadi èn per rumantsch. Uschia è scrit bainvegni a la recepziun, ed era ulteriurs avis ed infurmaziuns èn scrittas tranter auter sin rumantsch, di Silvana Beer. Era impurtant saja per ella che las collavuraturas ed ils collavuraturs discurran almain in zic rumantsch. Ma ella engaschia era gugent persunas indigenas, di la manadra dal campadi. Ma ina premissa per lavurar tar ella na saja la lingua betg.
Pliras activitads
Sin il campadi pon ils giasts far pliras activitads. Uschia èsi pussaivel da visitar ils avieuls ed ils peschs, ma era far joga e la finala emprender rumantsch. Quai saja sulet ina part da las activitads, ed impurtant saja che tuts e tuttas hajan da raquintar ina ni l’autra istorgia cura ch’els van puspè a chasa ed associeschan las vacanzas sin il campadi a Mustér sco eveniment, di Silvana Beer. Ed uss cumenza la stagiun auta ed il campadi è quasi vendì ora, quai grazia a la cuntrada idillica e forsa era a la gestiun simpatica.