Il turnier da troccas organisà da l'Uniun grischuna da troccas ha cuzzà davent da la damaun a las 8:30 enfin la saira da las 22:30. I è pia vegnì giugà passa 10 uras. Uschia n'hai betg mo duvrà bunas chartas per daventar victura u victur, mabain era perseveranza e concentraziun.
La fin han Daniel Deragisch e Georg Bearth gì il pli bler da quai, ed las meglras chartas.
«Strusch in», «da Tujetsch», «Nus dein!»
L'ustaria Casa Cruna a mez il vitg da Mustér è stada fullanada cun giugaders e giugadras passiunads da troccas. I è vegnì ponderà, discurrì e mintgatant er auzà la vusch. Var 70 persunas èn sa participadas al 17avel campiunadi da troccas grischun.
Enturn mintga maisa sesevan quatter persunas. Las bleras dad ellas èn gia in zic pli veglias. A mez la maisa sa chatta in tarpun quadratic nua che las chartas vegnan plazzadas. In suenter l'auter dat mintgin e mintgina sias chartas.
Il gieu da troccas consista da 78 chartas: 14 spadas, 14 cuppas, 14 rosas, 14 bastuns, 21 troccas ed il nar.
Las spadas, las rosas, ils bastuns e las rosas èn las colurs dal gieu.
Ils retgs da mintga colur, il bagat (numer 1 da las troccas), il mund (numer 21 da las troccas) ed il nar vegnan numnads «ils honors» e valan tschintg puncts.
Las reginas da mintga colur valan quatter puncts, ils chavaliers mintgamai trais puncts ed il buobs dus puncts.
Las «lecras» e las ulteriuras troccas na dattan nagins puncts.
Perquai ch’i vegn quintà ils pitgs (Stiche) e betg las chartas, dastgan ins dentant quintar in punct per pitg che consista da quatter «lecras» u troccas senza valur.
Troccas vegn adina giugà en pèrins da dus. Al campiunadi ha mintga pèrin d'absolver otg gieus a quatter rundas. Quels cun ils pli blers puncts giogan suenter per la victoria. Ils auters e las autras giogan medemamain vinavant per pudair meglierar lur plaz.
Betg mo in gieu per glieud veglia
Era sch'ins ha chattà cunzunt persunas pli veglias, èn tranter els era intginas fatschas pli giuvnas. Uschia sa participeschan per exempel Elena Candinas da Surrein e Sara Norina Bearth da Rabius gia per la secunda giada al campiunadi. Ellas han gia da pitschnas cumenzà a giugar troccas en famiglia.
I saja plitost grev d'animar persunas giuvnas da dar troccas, di Annalisa Cathomas da Glion ch'è la mainagieu e ch'organisescha gia per la 17avel giada il campiunadi. Tuttina saja impurtant da dar vinavant questa tradiziun rumantscha e quai fa la magistra cun organisar curs e cun mussar a ses agens scolars e scolaras co giugar.
Ella saja creschida si cun ils gieus da chartas sco troccas e jass, di Annalisa Cathomas. E perquai haja ella avant radund 20 onns gì il giavisch d'organisar in campiunadi grischun. Da lezzas uras aveva era la PCD Grischuna cun Martin Candinas beneventà quell'idea ed uschia gidà d'organisar il campiunadi.
Co che las troccas èn vegnidas en Surselva
Da l'Italia e sur la Frantscha han ils mercenaris purtà il gieu en Svizra. Cunzunt en lieus muntagnards vegniva e vegn anc adina dà troccas. En il Grischun vegni giugà en Surselva – cunzunt en la Cadi.
