Siglir tar il cuntegn

Header

audio
Canorta Lumpazi festivescha 10 onns
Or da Actualitad dals 14.11.2023. Maletg: RTR
laschar ir. Durada: 2 minutas 59 Secundas.
cuntegn

Canorta Lumpazi Adina ils 10 dal mais ina occurrenza da giubileum

La canorta Lumpazi a Mustér po festivar il giubileum da 10 onns ed ella fa quai a moda speziala.

L’idea è da far festa cura che las festas crodan, di la manadra da la canorta Lisa Giorgio. Uschia èsi planisà da far mintgamai il 10avel dal mais ina occurrenza. Cumenzà hajan els cun ina grillada e cun ina purschida durant las vacanzas da stad. La proxima saja in concert da Nadal.

In dals puncts culminants fiss stà ils 10 da november en la sala Peter Kaiser en claustra da Mustér. L’idea era da far ina tschaina da gala per tut la populaziun, ma il plan da termin era sportiv ed uschia n’hai betg dà avunda annunzias. «Uss avain nus spustà quella tschaina da gala sin ils 8 da november 2024 e nus sperain fitg che quai vegni a dar avunda annunzias», di Lisa Giorgio ch'organisescha las festivitads dal giubileum cun ina gruppa da geniturs.

Canorta Lumpazi – in'istorgia da success

Dapi 10 onns datti gia la canorta d’uffants Lumpazi a Mustér. «Surtut durant ils emprims onns hai gì num da sa defender cunter pregiudizis», declera la manadra da la canorta Lisa Giorgio. Era ella po festivar ses giubileum da 10 onns. Guardà enavos saja stà bel da vesair sco che tut creschia e vegnia pli grond, e surtut era che la purschida vegnia appreziada. Il mument ha la canorta 80 uffants en la tgira, surtut era en la tgira dal di, tant a Mustér sco era a Trun. Perquai datti era ina glista da spetga.

A la tschertga da dapli persunal

Il mument ha la canorta dapli annunzias che pussaivladads da prender uffants. Trais plazzas da lavur libras hajan els en il mument e la tschertga na saja en l’entira branscha betg simpla. Ils ultims onns hajan adina dapli persunas tschernì questa via da scolaziun, uschia spera Lisa Giorgio fitg da pudair chattar persunas che vegnan a lavurar a Mustér. Fin ch’els n’hajan dentant betg quellas persunas dettia propi in stop da prender si uffants, accentuescha la manadra da la canorta che sesa era en la suprastanza chantunala da las canortas en il Grischun.

RTR actualitad 11:00

Artitgels legids il pli savens