La vischnanca da Flem e differentas uniuns per l’ambient èn sa cunvegnidas, co remplazzar la pendiculara da Cassons. Las differentas partidas hajan chattà ina soluziun che cuntentia tant la protecziun da la natira, sco er las pendicularas, hai num en la communicaziun. Grazia a questa cunvegna po la lingia da remplazzament uss vegnir realisada.
Flem po votar ils 13 da zercladur
La lingia per la pendiculara ch'è uss proponida e vegn sustegnida da tut las partidas, evitescha da traversar dublamain in territori da protecziun sensibel en la regiun da Grauberg. Il traject maina da nov da Startgels a Segnas e sa sroma là d'ina vart vers Nagens Sura e da l'autra vart vers Ils Cugns (Cassons).
Grazia a la buna collavuraziun cun la destinaziun da Flem Laax Falera hajan ins chattà questa schliaziun, vegn Raimund Rodewald, da la Fundaziun protecziun da la cuntrada cità en la communicaziun. Cun questa lingia alternativa va era Martin Hug, president da vischnanca da Flem, d'accord. Uschia èsi uss cler, ch'ils da Flem pon votar ils 13 da zercladur davart la planisaziun locala da Flem
