Siglir tar il cuntegn

Header

Visualisaziun Center Fontauna.
Legenda: Visualisaziun Center Fontauna. MAD
cuntegn

Center da sport e cultura Chantun sustegn finanzialmain il project

Il sustegn finanzial ch'il center da sport e cultura a Mustér survegn dal chantun Grischun e da la Confederaziun sa cumpona da trais elements. Sut il titel da la nova politica regiunala dat la Confederaziun in emprest senza tschains da dus milliuns francs. Finanziads vegn il credit ord il program San Gottardo.

Medemamain ord il program San Gottardo datti ina contribuziun a fonds perdu da 460'000 francs per tschainsir ils credits da banca per ils proxims 20 onns. Il chantun Grischun dat ina contribuziun d'in milliun francs a fonds perdu. Quai damai ch'i sa tracta tar il center Fontauna d’ina infrastructura relevanta al sistem.

Collavuraziun regiunala

Premissa per il sustegn finanzial da chantun e Confederaziun è ina collavuraziun turistica en regiun. Uschia ha il conclus da las vischnancas da Mustér e Tujetsch da metter il Center Fontauna a Mustér ed il Bogn Sedrun sut in tetg organisatoric gì in effect positiv per ils sustegn finanzial al project actual.

La decisiun da la regenza è in ferm segn che collavuraziun renda. Senza quella collavuraziun da las vischnancas da Mustér e Tujetsch, e forsa en l'avegnir era autras vischnancas da la Cadi, na fissi betg pussaivel da far in tal project.
Autur: Ruedi Büchisviluppader regiunal Surselva

Votaziun a l'urna ils 27 da settember

Cun il sustegn finanzial da chantun e Confederaziun s’augmentan las schanzas ch’il project vegn approvads da la populaziun da Mustér. Sco il commember da la suprastanza communala e president da la cumissiun preparatorica Clemens Berther ha ditg a RTR, quinta la vischnanca cun in gea a la votaziun da savair cumenzar cun las lavurs da bajegiar la primavaira 2021.

RTR actualitad 12:00

Artitgels legids il pli savens

Scrollar a sanestra Scrollar a dretga