Il parlament communala da la vischnanca da Mustér ha approvà cun 12 cunter duas vuschs il project per in nov center da sport e cultura. Uschia è il project per la sanaziun e renovaziun da l’emprima etappa in pass enavant. Il credit approvà munta a 9,69 milliuns francs.
Datti in sustegn dal chantun?
Il sviluppader regiunal Rudolf Büchi ha accentuà ch’il chantun na dettia normalmain nagins daners per talas sanaziuns. Ma cun la collavuraziun da las vischnancas da Tujetsch e Mustér e cun in nov hotel Acla da Fontauna saja pussaivel che la regenza grischuna concedia daners a fond perdu per il project en connex cun infrastructura turistica relevanta al sistem. In bun segn saja gia che l’Uffizi da turissem haja surdà la fatschenta per decider els mauns a la regenza, ha ditg Rudolf Büchi.
Ultim pled ha la populaziun a l'urna
La populaziun n’ha betg pudì esser preschenta durant la sesida dal parlament communal da Mustér. Quai pervi dal coronavirus. Perquai duai la populaziun vegnir orientada la fin d’avust sur dal project anc en detagl ed alura saja quai era cler sche quai dettia daners dal chantun per il project. L’ultim pled en chaussa ha la populaziun da Mustér en ina votaziun a l’urna. Il termin n’è anc betg enconuschent.
