In tschientaner stat la chamona dal Terri a l'ur da la planira da la Greina e dat albiert a viandantas e viandants da lunsch e da manaivel. Ella ha franc udì bain inqual istorigia aventurusa e passentà urizis, navadas ed aura da bellezza. La tegia che vegn gestiunada da la secziun Piz Terri dal Club alpin svizzer festivescha ses 100 onns cun musica e festa. Cun questa chaschun vegn er gist inaugurada la chamona renovada da l'architect lumnezian Gion A. Caminada.
Hager, Terri u Greina?
L'onn 1925 ha la Secziun Piz Terri construì la camona dal Terri sin 2'170 meters sur mar. Sco ins po leger en la cronica da la secziun per il giubileum da 100 onns è quai capità en preschientscha da radund 100 commembers dal club. In interessant detagl da l'istorgia pertutgaa il num da la chamona. A disposiziun stevan trais variantas: Hager, Terri u Greina. Hager tenor il num dal pader Karl Hager, commember d’onur da la secziun. Per motivs geografics ha la tegia survegnì il num da la muntogna. «Damai ch’il num Greina vegn considerà plitost sco pass è la chamona vegnida battegiada cun il num Terri», seregordan ils exponents da la secziun. In’interessanta indicaziun en la cronica pertutga era il quint dal bajetg, preschentà la fin dal 1925: «La tegia ha custà 20'165.35 francs, da quai èn 18'805.05 gia pajads. Dapi l’avertura hai dà entradas en tegia da 117.50 francs.»
100 onns pli tard è la chamona dal Terri pli che s’etablida sco lieu da dimora tschertgà en il territori da la Greina. 3710 pernottaziuns ha ella nudà l'onn passà e quai malgrà ch’il plaz è stà limità pervia da las lavurs da construir. Quai è stà in quart pli pauc ch’igl onn avant cun in manaschi cumplain. L'onn 2025 è la chamona vegnida engrondida ed il medem mument èn las chombras da durmir vegnidas structuradas da nov. «Cun occasiun da las lavurs vid la chamona l'onn 2008 era la part amez dal bajetg betg vegnida renovada. Quei project avain nus realisà l'onn passà. Nus avain auzà la part davant encunter la Val Sumvitg e stgaffì chombras pli pintschas tenor ils basegns da la clientella», di Selina Schmed ch’è cassiera da la secziun dapi 2019. Dapi la primavaira 2026 tgamuna ella la secziun ad interim suenter la mort prematura dal president René Cavegn.
Chombras pli pitschnas e novs indrizs sanitars
La chamona ha ussa sper chombras pli grondas era combras per duas, quater e sis persunas. Tut en tut porscha ella 94 letgs cun madrazzas pli ladas ch’avon. Plinavant hai dà bajetg annex nov cun indrizs sanitars. Medemamain è la situaziun cun sortida d’urgenza vegnida meglierada ed adattada a las prescripziuns novas. Las lavurs d’engrondaziun e restructuraziun èn succedidas sut l’egida da l'architect Gion A. Caminada. Tenor Selina Schmed ha il project custà radund in milliun e miez.
Or da l'archiv