Las ultimas emnas è la situaziun en la «Casa Sogn Martin» stada difficila: Pliras cussadentas e cussadents han gì da sbatter cun ina infecziun da corona. Sco il mainachasa Donat Nay ha confermà, sajan quai stadas 29 cussadentas e cussadents, e 15 persunas da l'entir persunal, betg sulet da la tgira. E 4 persunas èn la finala mortas cun corona.
Senza sustegn fiss quai stà nunpussaivel
Per survegnir sut controlla la situaziun ha quai dà in scumond da visitas. E la gronda part da las persunas en chasa ha gì da star en chombra. Quai ha la finala dà dapli lavur. Per dar dumogn a quella lavur ha la chasa d’attempads survegnì sustegn da la protecziun civila. Quai saja stà in bun sustegn. Las persunas hajan gia gì experientschas or da sumegliantas situaziuns, di Donat Nay.
La virola da rinfrestgament vegn
Dapi curt hajan ins pudì s'annunziar per la virola da «booster», di il mainachasa. Quai sajan quasi tut las persunas che na sajan betg s’infectadas las ultimas emnas. La speranza saja gronda che quella portia in meglierament. Ma ins na possia betg dir che la situaziun avessia pudì vegnir evitada cun questa virola, agiunta Donat Nay. Tuttina, la speranza saja segir avant maun. Era stoppian ins dir che surtut las famiglias hajan mussà gronda chapientscha per la situaziun ed uschia sajan ins vegnì communablamain da surmuntar quest grev temp.
