La fin da december 2024 era il TCS Svizra sa retratg sco investider per il project d'in lai e campadi a Sumvitg, sisum la Surselva. Uss annunzia la vischnanca ch'ins haja chattà in nov partenari per realisar la part da l'alloschament. La Stadler Immobiglias SA veglia surpigliar il project, ensemen cun la Tarcisi Maissen SA da Trun, scriva la vischnanca en ina communicaziun a las medias.
Ils novs investurs vulan construir a la riva dal nov lai planisà 30 chasas pitschnas. Las investiziuns per quellas chasas duajan muntar a 10 fin 15 milliuns francs.
Nus finanziain sulet la construcziun da las 30 chasettas agl ur da la riva dil nov lai. Cura che quellas en construidas e vendidas è il project terminads per nus
Ils custs per la construcziun dal lai da far bogn, dal campadi e tut l'infrastructura vegnan calculadas da la vischnanca da Sumvitg cun circa 30 milliuns francs. Quels custs sto la vischnanca finanziar. Co la finanziaziun vesa ora è il mument na saja anc betg cler. Era tgi che duaja manar il campadi planisà na saja anc betg enconuschent.
La vischnanca da Sumvitg na sa betg finanziar ils custs da 30 milliuns cun agens meds. Nus quintain cun contribuziuns dil maun public e da fundaziuns. Igl entir plan da finanziaziun na stat anc betg
La Stadler Immobiglias SA ch'ha sia sedia principala a Rapperswil-Jona, ha terminà plirs projects da construcziun en la regiun, dapi l'onn 2009.
Chantun ha evaluà il project original
L'onn passà hajan ins inoltrà al chantun in rapport preliminar. Il resun da l'Uffizi per il svilup dal territori haja mussà las sfidas per la planisaziun locala. Perquai hajan ins surlavurà l'entir project ed elavurà diversas variantas.
La structura futura per manar il project general stat
L'areal dal lai, la plazza da campar sco era il bajetg principal restian en possess da la vischnanca da Sumvitg. Per ils alloschis vegn creà ina societad autonoma, ina proprietad en condomini (StWEG). Ils gestiunaris per las differentas spartas, sco la gastronomia u il campadi vegnan tschernids en ina proxima fasa dal project.
Las planisaziuns actualas cumpiglian in lai natiral, purschidas dal temp liber ed alloschis – sco era ina part gastronomica. Sco proxim duai il project puspè vegnir inoltrà al chantun per in'examinaziun preliminara.