Il project Lai Salischinas sin intschess da la vischnanca da Sumvitg ha chattà ina soluziun en connex cun la lingia d’auta tensiun che maina tras il lai futur. Ina soluziun che po er vegnir realisada a temp. Uschia èsi previs da spustar ina da las pitgas da la Swissgrid e manar las lingias sur las vias existentas e betg pli amez tras il lai futur. Quai saja surtut impurtant per evitar che l’entir project s’entarda, ma tuttina stoppian ins quintar cun almain in onn dapli da realisar tut, uschia il president da la cumissiun responsabla Placi Wenzin. Ma vis sur l’entir project ora na saja quai betg uschè decisiv.
Er chattà soluziun cun ils possessurs da terren
Er en connex cun l’acquista da terren èn ils responsabels in pass enavant, quai ha Patrick Schaniel, il president communal da Sumvitg, ditg a la radunanza generala da l’uniun. Els veglian tractar tuts tuttina ed hajan perquai decis d’indemnisar tuts en furma da daners, perquai che terren adequat da barattar manchia, uschia Schaniel. Il mument hajan ils possessurs in pre-contract sin maisa e quintà saja da serrar giu questa fasa anc questa stad. Lura sajan ins propi in pass enavant. In ulteriur pass impurtant è la midada da las zonas correspundentas. Quellas ston la finala vegnir midadas tras ina decisiun dal pievel da la vischnanca da Sumvitg e dal chantun. Qua saja impurtant da far uss ils pass concrets per vegnir da serrar giu quai, han ditg ils responsabels.
Lavurà gia vi da concept da manaschi
Per vegnir da realisar la planisaziun han ils responsabels er gia cumenzà ad elavurar concepts da manaschi per il futur camping e glamping. Qua lavurian els fitg stretg cun il gestiunari futur dal campadi TCS. Ma impurtant saja che l'entir project vegnia realisà cun implementar tut las resursas indigenas en il project, quai vul dir ch’ins veglia integrar products regiunals e purschidas regiunalas per pudair propi generar ina plivalur per tuts, han ils responsabels orientà la radunanza generala. La finamira da realisar il lai da far bogn e divertiment è anc adina l’onn 2027. Avant ston ils responsabels dentant anc vegnir ensemen cun ils daners necessaris, probabel la gronda da las sfidas dal project «Lai Salischinas».
