Siglir tar il cuntegn

Header

cuntegn

Lai Salischinas Soluziun per cumpensar il terren pudess esser il sauar prads

L’uniun «Lag Salischinas» è s’entupada per la radunanza generala. Las commembras ed ils commembers èn vegnids infurmads davart il progress dal project. La finala n’han ins anc betg chattà la soluziun perfetga per l’acquist dal terren necessari per la realisaziun dal project. Ina proposta uss sin maisa è da cumpensar la perdita da terren cun la pussaivladad da sauar ulteriurs prads ed uschia augmentar la fritgaivladad. Sco il commember da la gruppa da lavur e sez pur pertutgà, Emanuel Giger ha ditg a la radunanza, saja quai ina soluziun pussaivla per ils purs. Ma tut ils detagls na sajan anc betg sclerids. Per pudair far valair ils interess da l’agricultura èn ils 9 purs pertutgads s’unids en ina uniun independenta cun il num «Uniun Prau Bi». Da principi sajan ils purs pertutgads betg cunter il project e perquai era interessads da chattar svelt ina soluziun e la pussaivladad da sauar ils prads en il futur saja segir ina opziun, uschia èsi vegnì infurmà a la radunanza generala.

Sfidas avunda

Il mument èn dus biros spezialisads vegnids incumbensads dad elavurar ils detagls dal project. Uschia possian ins garantir che la lavur vegnia fatga pli svelt ma tuttina a moda professiunala, di il president da l’uniun Diego Deplazes. Che tut va ditg, è da contribuir che blers uffizis sin palc naziunal e chantunala sajan involvids. Uschia saja grev da vegnir svelt tar ina soluziun. Ma il plan actual da realisar il project sin il 2026 saja realistic, ma segir era fitg sportiv, uschia Deplazes. Uschia saja uss la planisaziun dal territori in grond tema, ma quasi tut saja instradà e sin buna via, din ils responsabels.

Era ils daners èn in tema, uschia è in credit dal project San Gottardo en mira. Dals partenaris dals ulteriurs chantuns vegnian signals positivs, uschia ch’els quintian ferm cun il sustegn da radund 400’000 francs per la fasa trais dal project, ha ditg Diego Deplazes. L’uniun «Lag Salischinas» n’è betg pli responsabla per il project, ma haja da purtar quel e cun il sustegn da radund 800 commembras e commembers ord l’entir chantun ed ulteriuras parts da la Svizra, mussia quai a moda exemplarica. Era preschents e vegnids a pled èn Ruedi Büchi, sviluppader regiunal da la Surselva ed il president da la regenza Marcus Caduff. Omadus han accentuà ch’il project «Lag Salischinas» correspundia tant a las finamiras regiunalas per in svilup persistent dal turissem, sco era las chantunalas. Uschia è era vegnida accentuada la plivalur dal project, tant da Büchi sco da Caduff.

audio
Per tadlar curt e cumpact
aus RTR Audio vom 30.04.2022.
abspielen. Laufzeit 1 minuta 20 Sekunden.

RTR novitads 06:00

Artitgels legids il pli savens

Scrollar a sanestra Scrollar a dretga