Claudio Simonet candidescha puspè sco president da vischnanca da Medel. Gia dal 2004 enfin il 2010 era el stà president da vischnanca. Simonet ha 67 onns, è naschì e creschì si a Mumpé Medel, abitescha a Curaglia ed ha manà plirs onns la scola da musica Surselva. Ses hobis èn la musica e fotografar.
I dettia parallelas tranter el sco organist e la politica, per exempel cun trair ils registers e guardar tgenins che van bain ensemen.
Ins sa era far politica sin questa moda e guardar, tge va bain ensemen, tge registers ston ins trair.
Meglierar vias e sendas
Sco president communal veglia el meglierar l’infrastructura, saja quai per mantegnair la rait da vias communalas, mo alura surtut da mantegnair ed era schlargiar la rait da sendas. La Val Medel veglia porscher in turissem miaivel als giasts, declera Claudio Simonet.
La vischnanca da Medel stat finanzialmain bain. Quai grazia era a las entradas da l’aua e dal militar. Quai na sajan betg grondas summas, ma tuttina:
Igl è insatge che dat a nus la pussaivladad da far bella la fatscha da la val.
Plinavant di Claudio Simonet ch’el haja plaschair da las giuvnas e giuvens che stettian en vischnanca. Quels hajan gugent la Val Medel – quels sa tegnian ensemen ed hajan ideas da svilup. Perquai na stoppian ins betg far quitads per l’avegnir.