Suenter sia ordinaziun sacerdotala dal venderdi, ha pader Murezi tegnì la dumengia sia emprima messa en la baselgia da la claustra ch'era bain emplenida. Suenter la messa era el levgià e cuntent:
Ussa entschaiva in nov chapitel, jau pos dar vinavant quai ch'jau survegn da Dieu als cartents.
Per mai è la religiun in fundament nua ch'jau bajegel si mia vita.
Suenter 30 onns survegn la claustra da Mustér puspè in pader rumantsch. Pader Murezi è dapi l'ordinaziun da l'avat Vigeli Monn l'emprim spiritual nov da lingua materna rumantscha. L'um da 28 onns ha frequentà la scola primara a Cuschnaus ed il stgalim superiur a Vella. El è entrà en claustra l'onn 2016 suenter ina scolaziun sco ortulan da cuntrada a Glion e Rorschach SG sco era suenter il servetsch militar.
En claustra dastg jau era lavurar en iert e quai dat a mai forza.
A Mustér ha pader Murezi finì ses studi da teologia ed è tranter auter s'engaschà per la lavur da giuventetgna. Ses giavisch saja da far accessibla ad auters la forza e speranza ch'el dastga sentir tras la cardientscha, ha el ditg envers RTR. Ussa haja el da surprender novas responsabladads sco far oraziuns e messa, insumma star davanttiers.
El na veglia betg esser in pader strict, el veglia esser in pader ch'ins ha gugent e dumonda gugent per sustegn. Ed el veglia er esser in pader che gida gugent a la glieud, tradescha el vinavant.
La messa nuvella en sia patria a Cumbel suonda ils 21 d'avrigl.
