«Il chantun lavura vi da la producziun da novs meds d’instrucziun e quai vulain nus renconuscher.» Quai ha il president da la Conferenza generala sursilvana (CGS), Adrian Cathomas, ditg suenter la radunanza generala a la FMR. «Il Chantun è bain vidlonder, mo per nus vai simplamain memia plaun.» En ses rapport annual constatescha il president da la CGS, ch’il chantun haja preschentà ina priorisaziun dals meds d’instrucziun en ina sesida cun la suprastanza da la CGS il favrer passà. Mo tenor quella priorisaziun vegnian ils meds d’instrucziun per tscherts roms en rumantsch u en talian mai a vegnir producì. «Il chantun stuess exnum disponer in budget pli aut per ils meds d’instrucziun. Nossas resursas persunalas per sa gidar èn numnadamain avant maun», ha Adrian Cathomas ditg.
Il Chantun stuess exnum disponer in budget pli aut per ils meds d’instrucziun.
Malgrà la critica al Departament chantunal d’educaziun, cultura e protecziun da l'ambient, che la situaziun actuala cun ils meds d’instrucziun en sursilvan na correspundia betg a la lescha e na saja betg cumpatibla cun il Plan d’instrucziun 21, ha Adrian Cathomas suttastritgà che la magistraglia sursilvana saja pronta da sa gidar cun elavurar ils novs meds d’instrucziun. «Da princip vulain nus cultivar vinavant ils contacts cun il chantun e nus vegnin era a contactar deputadas e deputads da la Surselva en chaussa. Plinavant ponderain nus en tge furma ch’ina collavuraziun cun la Lia Rumantscha faschess senn.»
Cusseglier guvernativ Jon Domenic Parolini, il schef dal Departament chantunal d’educaziun ha respundì suenter la radunanza da la CGS a la FMR, ch’el accelerassi fitg gugent il tempo en la producziun dals novs meds d’instrucziun en rumantsch e talian. «La chasa editura chantunala da meds d’instrucziun è dentant dependenta da resursas externas per realisar ils meds d’instrucziun. Quellas resursas externas sco per exempel didacticas da la Scol'auta da pedagogia, da translaturs e lecturas en ils idioms stattan a disposiziun a nus mo parzialmain.»
La chasa editura chantunala da meds d’instrucziun è dependenta da resursas externas per realisar ils meds d’instrucziun.
Jon Domenic Parolini ha plinavant ditg, ch’el vegnia a proponer en il preventiv 2024 in augment da 100'000 francs per meds d’instrucziun. «Quest preventiv per meds d’instrucziun è s’augmentà ils davos 21 onns per bunamain 600'000 francs.»
