La raschun per la crudada da l’aviun dal tip Ju-52 sur Flem avant dus onns saja stà in sbagl dals pilots. Els n’hajan betg resguardà l’autezza minimala da sgular. Quai rapporta la «SonntagsZeitung». La gasetta sa referescha al rapport dal Servetsch svizzer d’inquisiziun da segirezza che n’è dentant anc betg vegnì publitgà.
En il rapport vegn discurrì da manevers da sgular fitg ristgants e da risicos betg necessaris. Ils dus pilots sajan sgulads bler memia bass en la foppa en il sid-vest dal Piz Segnas e n'hajan perquai betg gì ina schanza pli da far ina storta. ll rapport definitiv dal SUST duai vegnir publitgà il pli baud la fin d’october.
En connex cun la disgrazia dals 4 d’avust 2018 cun 20 unfrendas prenda la Confederaziun er sut la marella l’Uffizi federal d’aviatica civila. Ella ha gia ordinà in’examinaziun externa. L'examinaziun fa l'Institut d'aviatica dals Pajais Bass. Cun resultats quintan ins la primavaira 2021.
