Siglir tar il cuntegn

Header

cuntegn

Cultura tranter far ed spustar «Frisal – Frisal» è il 2021 – la «Passiun da Mattiu» 2022

1979 è il musical Frisal – Frisal vegnì preschentà en chasa da scola a Danis. Uss vul Armin Caduff realisar l’avrigl 2021 ina cuntinuaziun en vista al giubileum da 40 onns Compagnia Rossini.

audio
Occurrenzas grondas: Ils ins han disditg ellas autras vegnan realisadas
ord Actualitad dals 03.08.2020.
laschar ir. Durada: 2 minutas 45 Secundas.

Tuttenina: Naginas emprovas

Sco Armin Caduff di, hajan ils exercizis per Frisal – Frisal gia entschet avant il temp dal coronavirus. Fin mez mars vevan els fatg emprovas cun in chor, il chor d’uffants ed ils solists. Els erian sin buna via, era finanzialmain, perquai che la mesadad dals daners era rimnada. Il preventiv per il musical è ca. 200’000 francs, di il musicist che ha scrit il text e cumponì las chanzuns.

Nus levan gia cumenzar cun las scenas sin tribuna, ed alura tuttenina hai gì num: I na dat nagut pli, naginas emprovas.
Autur: Armin Caduff musicist e cumponist

Els avessan gugent preschentà il musical la stad. Mo alura avessan els gì problems cun termins dals chantadurs e musicists, mo oravant tut perquai che Flurin Caduff (chantadur e reschissur dal musical) saja gia engaschà la stad cun in’autra opera.

Els fissan dentant cuntents da pudair emplenir la sala en chasa da scola a Danis set giadas, di Armin Caduff.

Set giadas è bler perquai ch’igl è tuttina ina gronda responsabladad era per ils chantadurs ch’els stettian quest temp en furma, da buna sanadad e che las vuschs sajan super en furma.
Autur: Armin Caduff musicist e cumponist

Clau Scherrer, il musicist e dirigent (tranter auter dal chor Cantus Firmus) ha spustà la Passiun da Sontg Mattiu da Bach sin il mars 2022.

La probabilitad che la situaziun è il mars 21 normala, vul dir ch’ins po star in sper l’auter e chantar e sunar e che la glieud po vegnir en baselgia in sper l’auter, è fitg pitschna.
Autur: Clau Scherrer musicist e dirigent

Plinavant saja quai era in ristg finanzial. Il project cun la Passiun da Sontg Mattiu custa ca. 120’000 francs.

I fetschia mal da stuair spustar quest'ovra. Ma els sajan disads, els hajan gia stuì annullar set concerts.

Quel qua fiss stà noss agen project e nus avessan gì grond tschaffen. Ma per cletg na svanescha quai betg, quai pon ins era far en in onn.
Autur: Clau Scherrer musicist e dirigent

RTR actualitad 12:00

Artitgels legids il pli savens