Christoph Schmidt vul daventar president communal da Flem. Quai resorta d'ina communicaziun a las medias. Schmidt ch'è senza partida veglia s'engaschar per l'attractivitad e la vitalitad da Flem.
Christoph Schmidt ha 51 onns ed è dapi il 2008 possessur dal Hotel «Schweizherhof» a Flem. Dapi il december 2023 maina el sez l'hotel. Avant ha Schmidt manà per 16 onns sco commember dal management l'hotellaria e gastronomia da l'Arena Alva.
Ultra da quai è el president da la «hotelleriesuisse Flem Laax Falera», commember dal cussegl d'administraziun da la «Flem Laax Falera Mangement SA», commember da la suprastanza da l'uniun «hotelleriesuisse Grischun» e commember dal cussegl da la banca naziunala da la svizra orientala.
«Jau vul integrar tut las gruppas d'interess en il svilup, tadlar tiers activamain e ir encunter a las persunas», vegn Schmidt cità en la communicaziun. Schmidt è l'emprim candidat per il presidi. L'elecziun è ils 22 da settember 2024.
Nicola Fantini candidescha per la segunda giada
Gia il 2020 ha Nicola Fantini candidà per il presidi. Lura aveva Martin Hug gudagnà cun 857 vuschs, Nicola Fantini aveva survegnì 287. Il president ch'era da lez temp en uffizi n'avevan ils da Flem betg reelegì, quel aveva survegnì mo 157 vuschs.
Che Nicola Fantini è uss puspè motivà da candidar per il presidi, ha el confermà a la FMR e declara: «Ch’jau annunziel mia candidatura uschè baud ha l’avantatg ch’jau poss ma barattar cun la populaziun.»
Auter che Christoph Schmidt n'è Nicola Fantini betg creschì si a Flem. Dapi prest 20 onns è el là sco osp da vacanzas e dapi bun 12 onns abitescha el permanentamain a Fidaz cun sia dunna ed ils dus uffants da scola. Fantini è naschì il 1964 a Turitg, el è econom da manaschi ed informaticher. Ensemen cun Martin Hug, Sol Brit Bonderer Imper, Jürg Caprez e Guido Casty ha el cumenzà il prim da schaner 2021 la nova legislatura da la suprastanza communala. Dapi lura sajan blers projects vegnids realisads. E cun quels vuless il candidat Nicola Fantini cuntinuar sco president communal.
Tranter auter vul Nicola Fantini cuntinuar cun ils sforzs da stgaffir spazi d'abitar pajabel per ils indigens. «En buna bilantscha cun in turissem attractiv e da qualitad duess Flem pudair sa sviluppar vinavant, sco vitg vital ed adattà per famiglias».
Martin Hug banduna Flem
Il president communal actual, Martin Hug banduna Flem cun la fin da l'onn per surpigliar ina nova incumbensa a Zermatt.
