Bouldrar pon ins en Surselva a Mustér, a Favugn u era a Cuira. Ma il viadi da la Lumnezia en mintgin da quests lieus è lung, perquai han ils iniziants tschertgà ina soluziun pli manaivla. Quai era perquai ch'els han famiglia e tras quai betg pli medem bler temp sco avant.
Nus avevan betg pli tanta peda per ir suenter la lavur anc giu Cuira a raiver.
Uschia è naschida l'idea per in local da bouldrar en lur val, lur patria. Dapi in mez onn èn els londervi vid las lavurs per la nova stanza. Sin 100 meters quadrat duajan ins pudair bouldrar, quai partì si sin duas stanzas: La gronda per ils gronds e l'entschatta da la stanza ina pitschna paraid per uffants. Sco emprim han ils dus iniziants stuì tschertgar sponsurs. Quels han els chattà, 22 firmas indigenas han sustegnì els. Latiers era la vischnanca – els sponsureschan la localitad da l'anteriura halla da gimnastica a Cumbel. Per il sponsoring è stà responsabel Curdin Derungs. Gino De Giorgi, in dals iniziants, è architect ed ha uschia pudì construir la stanza. Quai è stà ina nova experientscha per el:
Per mai è quai stà la pli bella sfida vid quest project da dastgair crear in spazi nua che la glieud sa mova.
La stanza survegn radund 20 rutas ch'els laschan struvegiar mintgamai da profis. Quai è impurtant per in local da bouldrar, pertge las rutas èn il bul d'in local ed èn quellas bunas lura attira quai era blers bouldraders. Curdin Derungs e Gino De Giorgi han fundà ina uniun per il local e mainan quella sco non-profit. Ils custs inizials han els gist pudì cuvrir grazia al sponsoring ed era cun il vender abunaments. Ma uschia na basta quai p. ex. betg per ina persuna che controllescha l'entrada u per in sistem deditgà a quai che custass enturn 10'000 francs. Perquai sa fidan els da las persunas ed han reglà l'entrada il mument sin basa da fidanza.
