En il rom da la davosa radunanza communala ha la suprastanza survegnì l'incumbensa d'elavurar in concept per generar raps per las investiziuns urgentas en l’infrastructura. L'idea ch'il president communal Markus Niederdorfer ha preschentà a la populaziun: in concept da crowdfunding sut il motto «save the magic» cun ina campagna da placats ed in'app. Finamira: rimnar 350'000 francs fin la fin da l'onn. Il president communal è persvas dal concept. El guardia cun optimissem vers l’avegnir.
La sera d'infurmaziun per la populaziun da Farera hai dentant dà grondas discussiuns. La collavuraziun tranter la vischnanca, il fittadin dal campadi a Farrera e la cuminanza d'interess Magic Wood na funcziuna betg. Quai para dentant gia d'esser pli ditg il cas.
Thomas Saluz, che maina gia 15 onns il campadi a Farera, avess giavischà ina collavuraziun davent da l'entschatta. Il president da la cuminanza d'interess, Martin Keller, di che la vischnanca haja gia contactà els l'onn passà e dumandà per agid. En curt temp hajan els mess en chomma in concept per generar dapli raps per la cassa da vischnanca. Quel concept n'haja la vischnanca dentant betg vulì.
Pertge che la collavuraziun dals differents exponents na funcziuna betg n'ha nagin pudì dir. La fin finala vulan tuts il medem – sustegnair il Magic Wood. I para dentant da tuttas duas varts anc da dar basegns da sclerir ch'ins vegniss insacura forsa betg mo da trair ensemen vi da la medema suga, mabain er en la medema direcziun.
