Il Spar a Mustér è stà collià durant decennis stretgamain cun in num: Caminada. Dapi il 1987 maina la famiglia la butia e n'ha uschia betg mo furmà il commerzi en detagl local, mabain era la vita en il vitg. Ussa va quest chapitel a fin: A partir dal prim da favrer surpiglia Spar sia filiala e maina quella en l'avegnir vinavant sco filiala directa. Per la famiglia Caminada era il Spar dentant bler dapli ch'in affar – el era ina part da sia istorgia da famiglia.
Ins po gia dir che quai è stà nossa lavur da la vita, il bajegiar si tut.
Cura che Erwin e Bernadetta Caminada han surpiglià la butia l'onn 1987 era quai in pitschen Denner. Durant ils onns han els bajegià ora cuntinuadamain il manaschi, cumplettà quel cun in workshop e pli tard cun in café. Uschia è il manaschi sa sviluppà pli e pli ad in center da scuntrada impurtant a Mustér.
Igl è stà in lung temp, ma tuttina in curt temp.
Ils 39 onns sajan passads spert sco il chametg. Il manaschi haja pretendì bler engaschi, savens hajan ins lavurà di e notg. Guardond enavos predomineschia dentant l' engraziaivladad. Ils resuns positivs da la clientella, numerus inscunters persunals e la colliaziun stretga cun il vitg hajan relativà las sfidas.
-
Bild 1 von 4. Erwin e Bernadetta Caminada avant la filiala dal «EPA» il 1998. Bildquelle: Erwin e Bernadetta Caminada.
-
Bild 2 von 4. Flurs per il di da l'avertura dal Spar. Bildquelle: Erwin e Bernadetta Caminada.
-
Bild 3 von 4. Bernadetta Caminada cun ils manscottins dal Spar tar l'avertura dal Spar l'onn 1999. Bildquelle: Erwin e Bernadetta Caminada.
-
Bild 4 von 4. Clients en butia, cura ch'il Spar è anc stà in supermartgà EPA l'onn 1998. Bildquelle: Erwin e Bernadetta Caminada.
Ina butia ch'ha furmà generaziuns
Actualmain, fin ils prim da favrer, vegn la fatschenta manada dal figl dad Erwin e Bernadetta: Fredy Caminada. El aveva sis onns, cura che ses geniturs han surpiglià la stizun. El è creschì si qua, ha fatg ses emprendissadi ed avant 12 onns ha el lura surpiglià sez la gestiun.
Igl è schon insatge spezial, sco in segund da chasa.
Schegea ch'el saja gia pli ditg stà persvas da betg restar en il commerzi en detagl, n'haja il manaschi mai laschà liber el. Passa dus decennis ha el lavurà en il Spar da Mustér - e quai cun grond engaschament. Marcant è cunzunt stà il contact stretg cun la clientella ed in team versà, dal qual sias collavuraturas e ses collavuraturs fan part.
Suenter tants onns saja ussa dentant il mument d'empruvar insatge nov.
Jau sun uss en in'auta vegliadetgna cun stuair dir: sch'ins mida, lura ussa.
La decisiun na saja betg crudada sur notg. Era ses geniturs hajan chapientscha per il pass da lur figl. Il cumià saja collià cun sentiments maschadads.
Igl è in egl che bragia ed in che ri.
Quietant saja che la butia vegnia manada vinavant. Il lavuratori, il café sco er il team da sis persunas restan.
-
Bild 1 von 5. Il team resta era suenter la midada part dal Spar a Mustér. Bildquelle: RTR.
-
Bild 2 von 5. Suenter in'era da bunamain 40 onns èsi temp da prender cumià. Bildquelle: RTR.
-
Bild 3 von 5. Bernadetta ed Erwin guardan enavos sin in bel temp da lavur. Bildquelle: RTR.
-
Bild 4 von 5. Ils Caminadas laschan sgular en algordanzas. Bildquelle: RTR.
-
Bild 5 von 5. Bainbaud na vegn era Fredy Caminada betg pli a lavurar en en il Spar dal vitg. Bildquelle: RTR.
Clientella tranter chapir e deplorar
La midada procura per differentas reacziuns tar la clientella. Ins mussia chapientscha per la decisiun da la famiglia e saja cuntent ch'il Spar existia vinavant. Il medem mument resentian ins dentant ch'in spiert famigliar giaja a perder cun la retratga da la famiglia. Che persunas indigenas han manà la butia haja fatg speziala l'atmosfera, din pliras vuschs. La famiglia Caminada vegnia a laschar enavos ina largia.
La pressiun da la concurrenza n'è betg decisiva
Sper il Coop e Volg è il Spar ina da las trais filialas dal commerzi en detagl a Mustér. Il squitsch da concurrenza saja bain stà da sentir ils ultims onns - decisiv per la midada na saja quel dentant betg stà:
Ils gronds smatgan ils pitschens. Cun quest squitsch èn ins disà d'ir enturn. Ma igl è raschuns plitost persunalas che m'han animà da smetter.
En Svizra vegnan las filialas manadas pli e pli savens directamain da l'interpresa. La filiala da Mustér sa classifitgescha ussa pia er en questa structura tranter circa 90 autras filialas dal Spar.
Cumià cun sguard enavant
Quai che vegnia a mancar a Fredy Caminada saja en spezial il contact quotidian cun ses team e cun la clientella. Il medem mument saja el persvadì che mintga finiziun stgaffeschia spazi per novas schanzas e chaussas. Professiunalmain giaja el ina nova via tar l'Assicuranza Zürich e s'allegria gia sin la sfida vegninta. Il Spar a Mustér resta – ma in'era marcanta dal manaschi da famiglia va a fin.