Il Spar è ina da trais stizuns da detagl a Mustér, sper il Coop ed il Volg. El vegn manà sin basa privata da la possessura da l'entir areal, la Caminada Gonda SA. A partir dal cumenzament da favrer 2026 na vegn quai betg pli ad esser il cas. Fredy Caminada (45) ha decidì da serrar il chapitel sco manader da fatschenta da la stizun e da s'orientar professiunalmain da nov.
Sin fundament da quella situaziun ha la Caminada Gonda SA decidì d'affittar las localitads da vendita, il café ed ils parcadis a la Spar Handels AG. Uschia vegn la stizun manada en l'avegnir sco filiala da quella, sco bleras autras en Svizra. La Spar Handels AG ha midà possessur quest onn. Ils possessurs da Spar Group Ltd. da l'Africa dal Sid han vendì ella a la Tannenwald Holding SA da Basilea.
«La Spar Handels AG n'affittescha betg mo l'infrastructura che pertutga la stizun, mabain surpiglia er il persunal», di Fredy Caminada. I sa tracta da sis persunas, ina en la plazza d'emprendissadi.
Interess d'esser a Mustér
«La Spar Handels AG vegn a decider sezza en tge furma ch'ella maina la stizun en l'avegnir. Ella ha dentant gì grond interess da pudair cuntinuar qua ed uschia da segirar sia plazza a Mustér», di Fredy Caminada. En mintga cas veglia la stizun era porscher en l'avegnir ses servetsch tranter auter cun char annex e frestgeras a las uniuns.
«Jau na sai anc betg exact en tge direcziun professiunala che jau vom a partir dal favrer. Jau sun en la vegliadetgna che jau less anc far ina giada ina midada», manegia il manader da fatschenta partent Fredy Caminada. El guarda enavos sin in fitg bel temp sco manader da la stizun: «Per quai hai jau impundì blera energia. Jau hai sentì il grond sustegn da blera clientella fidaivla.» Ch'el sa retira ussa n'haja da far nagut cun la nova possessura dal detaglist. I saja sulettamain ina decisiun persunala.