Ramadan è il num dal 9avel mais dal chalender islamic. Durant quest temp fan muslimas e muslims gigina. Els èn obligads da renunziar da la levada enfin la rendida dal sulegl a differentas chaussas, explitgescha Önder Günes, il president da la federaziun da las organisaziuns islamicas en Svizra.
Quai munta naginas spaisas e naginas bavrondas. Dentant quai munta era nagins products da giudiment sco per exempel cigarettas. Era contact sexual n'è betg lubì durant il di.
Il chalender islamic s'orientescha a la glina e betg al sulegl sco noss chalender gregorian usità. Ord quest motiv n'è il mais dal Ramadan betg mintg'onn il medem temp. Quest onn ha il mais da gigina cumenzà ils 18 da favrer e cuzza anc enfin ils 19 da mars.
Reflectar e giginar
Desister è dentant mo ina dimensiun dal Ramadan. La segunda dimensiun è numnadamain la purificaziun spirituala e quai è tenor Önder Günes atgnamain l'intent principal dal temp da curaisma.
Igl è dapli in mais, durant quel ch'ins sa purifitgescha internamain e sa concentrescha cumplettamain sin sasez e sin Dieu. La renunzia sin spaisas e bavrondas è simplamain insatge che fa part dal Ramadan.
Quella purificaziun spirituala munta tranter auter era sa regurdar da las bunas valurs da l'uman ed uschia esser engraziaivels, perdunar e gidar ad auters.
Decisiun individuala
Schebain che far gigina durant il mais dal Ramadan saja ina obligaziun religiusa per l'entira cuminanza islamica, saja quai chaussa da mintgina e mintgin sch'ella u el fa quai ed en tge moda e maniera, di Önder Günes.
I dat era persunas ch'èn deliberadas da questa obligaziun, per exempel uffants, dunnas en gravidanza u era persunas malsaunas. Quellas hajan era la pussaivladad da cumpensar il Ramadan, per exempel cun gidar glieud en paupradad u era da prender suenter ils dis e far in auter di da curaisma.
Implementaziun en il mintgadi
Ari Kotoric lavura sco tgirunz. Perquai è il giuven da 34 onns sa decis da pratitgar il Ramadan mo durant ses dis libers.
Cura ch'jau lavur èsi impurtant ch'jau sun fitg preschent, damai ch'jau lavur cun umans. Perquai hai jau decidì per mai ch'jau poss prestar dapli sche jau hai mangià insatge.
Durant quels dis ch'il Sursilvan fa Ramadan, legia el era il Coran, fa oraziun e reflectescha davart ses cumportament. La finala giaja era per in svilup intern e betg mo per far dieta.
Ari Kotoric, ch'è creschì si a Glion ed ha ragischs en la Bosnia, è muslim. Motivà da far Ramadan è el dentant pervia da l'experientscha sco tala da giginar e betg exnum pervia da la religiun.
Jau sun ina persuna fitg spirituala, na ves mai dentant betg sco part d'ina religiun. Tuttina vegn jau d'ina famiglia muslima ed uschia è il Ramadan in bun motiv da far gigina. Quai è insatge ch'jau fatsch fitg gugent.
Tut auter vesa ora il Ramadan quest onn tar Alex Paiman. Il giuven da 28 onns ch'è oriundamain da l'Afghanistan e viva dapi radund 10 onns en il Grischun, faschess bain gugent gigina, sto quest onn dentant laschar ora pervia da sia sanadad.
Dal tuttafatg na sto el dentant betg desister dal Ramadan. Alex Paiman cumpensescha quest onn la gigina. Quai saja per exempel pussaivel cun prender suenter ils dis da gigina u cun far donaziuns per glieud en paupradad.
Sche jau na pos betg far gigina, alura gid jau a la glieud en paupradad en mia patria. Uschia pon els cumprar mangiativas e resti.
El spera ch'el possia il proxim onn puspè far Ramadan sco usità – sco ch'el l'aveva pratitgà durant sia uffanza en l'Afghanistan. Dentant là n'è betg tut adina stà uschè strict. In u l'auter di haja el schon bavì u mangià insatge durant il di, raquinta Alex Paiman cun in surrir.
Or da l'archiv: