Dals 11 enfin ils 22 da fanadur daventa il chantun Grischun il center dal sport da cursa d'orientaziun. Emprim cun il campiunadi mundial, nua che radund 300 atlets ed atletas d'elita da 50 naziuns sa participeschan en las disziplinas media distanza, lunga distanza e staffetta. Pli tard datti era anc cursas popularas nua ch'i vegn quintà cun enfin 4'500 persunas.
Tenor la presidenta dal comité d'organisaziun Brigitte Grüniger Huber sajan ils organisaturs pronts. Ussa saja be pli da coordinar tranter ils differents ressorts e d'organisar ils davos detagls per l'arena d'arrivada tiers il center da sport Prau la Selva a Flem. Là vegn quintà cun bun 6'000 aspectaturas per di e durant las grondas occurrenzas cun enfin 10'000. La saira spetgan en il rocksresort a Laax concerts cun Enrico Lenzin, Baba Shrimps e Pat Burgener.
Nus ans legrain sin ina festa d'orientaziun en las muntognas grischunas.
L'occurrenza custa en tut enturn 3 milliuns francs. Il pli bler custa l'infrastructura temporara per l'occurrenza ed ils albierts per las squadras che fan part ad il campiunadi mundial. Tgi che va per la Svizra a la partenza dal campiunadi mundial vegn decis durant las cursas da tests ch'han lieu fin zercladur en il Valais.
