Cuschina per ina buna chaussa - Risotto, inscunters e cumpagnia – quai è la fiera d'atun
Che la «Gilda» cuschina per la Societad svizra da sclerosa multipla ha ina lunga tradiziun. Era a Glion, onn per onn s'inscuntran ils cuschiniers da la regiun per far risotto per ina buna chaussa.
Durant quest di cuschinan ils cuschiniers e las cuschinieras da l'organisaziun da gastronoms etablids da la Svizra per far attent sin la malsogna incurabla sclerosa multipla. La mesadad dals daners che vegnan rimnads quests di van a la Societad svizra da sclerosa multipla l'autra mesadad a la Casa Depuoz a Trun.
Legenda:
RTR
Sco quai che Toni Darms, l'organisatur dal di a Glion ha ditg, saja questa occurenza impurtanta per els, per l'ina per dar enavos insatge, per l'autra dentant era in lieu d'inscunter a la fiera. Era Martina Tomaschett da la Societad svizra da sclerosa multipla è stada presenta, ella menziunescha che talas occurenzas sajan fitg impurtantas per els, cunzunt per pudair dar ina fatscha a la malsogna ed uschia far attenta la populaziun ch'i dettia insumma la malsogna.
Societad svizra da sclerosa multipla
Avrir la boxSerrar la box
La societad è ina uniun d'utilitad publica che vul promover la qualitad da la vita da persunas pertutgadas, sustegna la perscrutaziun da la sclerosa multipla e promova la collavuraziun tranter persunas pertutgadas ed instituziuns, sco per exempel clinicas.
La societad è vegnida fundada 1959 a Berna ed ha radund 15'000 commembers.
En il Grischun datti dus lieus che fan quest di, oz a Glion ed ils 13 da november suonda alura anc Mustér, nua ch'i vegn cuschinà durant la fiera da Son Martin.
La Gilda
Avrir la boxSerrar la box
La Gilda è ina organisaziun gastronomica ch'i dat dapi il 1954. Tar lur criteris tutgan qualitad, creativitad ed ospitalitad. L'organisaziun vala sco uniun professiunala da la gastronomia svizra.
