La dunna dal chantun da Schaffusa aveva surpiglià il post sco manadra da la tgira il settember passà. Quai suenter ch'i aveva dà differenzas insuperablas tranter il mainachasa Retus Giger e l'anteriura manadra da la tgira. Ell'aveva lura bandunà la chasa da tgira ed attempads. Il manader n'è per in temp betg pli stà abel d'ademplir sia funcziun. Sco il president dal cussegl d'administraziun, Matthias Bundi, ha confermà envers la FMR, haja entant er Retus Giger bandunà definitivamain il manaschi.
Ruth Lichtensteiger saja grazia a sia lunga experientscha s'acclimatisada bain e sa sentia er bain en Lumnezia. Cun ella duai il ruaus turnar en chasa. Per la plazza sco manadra da la tgira, saja ina buna schliaziun en vista, uschia il president dal cussegl d'administraziun vinavant. Sin il manaschi e la qualitad da quel n'hajan quellas midadas e la situaziun interimistica nagin'influenza.
