Il streetArt festival «Autra Art» a Danis ha quasi tradiziun. Gia dapi il 2016 envida la chasa d’albiert «AutraCaussa», manada da Bettina Seiser e ses um artistas ed artists naziunals ed internaziunals a l'inscunter d’art, per malegiar graffittis sin lur chasa. Suenter las restricziuns nua ch’ins na pudeva betg organisar inscunters è il plaschair grond da puspè pudair sco quasi renovar la chasa, di Bettina Seiser. Il vegl fa plaz al nov e quai saja bun uschia, quasi sco en la vita.
-
Bild 1 von 7. L'AutraCaussa a Danis è in hostel cun art vi da la fatschada. Bildquelle: RTR, Gionduri Maissen .
-
Bild 2 von 7. La fatschada mussa uss in capricorn, dissegnà d'in artist mexican. Bildquelle: RTR, Gionduri Maissen .
-
Bild 3 von 7. Il capricorn cun las tgirallas. Bildquelle: RTR, Gionduri Maissen .
-
Bild 4 von 7. In dals novs grafittis sin l'AutraCaussa. Bildquelle: RTR, Gionduri Maissen .
-
Bild 5 von 7. Il duo-artistic queenKong, sisum Marco Schmid e giusut sia dunna Vero Schmid vid la lavur. Bildquelle: RTR, Gionduri Maissen .
-
Bild 6 von 7. L'ovra dal duo queenKong mussa era lur figlia. Bildquelle: RTR, Gionduri Maissen .
-
Bild 7 von 7. Bettina Seiser e sia famiglia. Bildquelle: RTR, Gionduri Maissen .
Quest onn datti in capricorn
Sin la fatschada principala è uss da vesair in capricorn. Quai fetschia spezial plaschair, ha tradì la possessura. Els na fetschian naginas perscripziuns a las artistas ed ils artists, sulet betg religius e betg politic, uschia Bettina Seiser. L’artist mexican Alberto Carlos saja s’infurmà suenter motivs tipics ed haja alura tschernì il capricorn. Sin la fatschada cunter ost ha il duo-artistic «queenKong» malegià in purtret da lur feglia en colurs rosa cun flurs e penels da designar, ina ovra communabla sco tut lur art, ha ditg Vero Schmid. Ma a Danis saja quai spezial perquai ch'ins possia cumbinar far art cun inscunters d’artistas ed artists da renum internaziunal e cun giudair la cuntrada muntagnarda e far vacanzas.
Festival finescha la dumengia
La proxima dumengia va il festival a fin. Lura possian ins vesair tut las ovras. Era da la partida eran tranter auter Nina Walkhoff da l’Ollanda e Sonic One da la Svizra. Ina festa na fetschian els betg per la fin, di Bettina Seiser. Els sa legrian adina sin visitas era durant il festival. Sch’ils maletgs restan questa giada per dapli ch’in onn na possian els betg dir, ma cun la vischnanca hajan els uss in bun contact e barat, accentuescha Bettina Seiser.