En il mintgadi asfalt sut las rodas, la fin d'emna en la glisch dals reflecturs: Dario Hess è gugent per las vias, stat darar airi e chatta uschia ses ritmus. In purtret davart in che viva tranter dus munds.
Dario Hess maina il camiun cun in maun tras la storta. Da surengiu è il mund in auter. La via para pli pitschna, las chasas vegnan pli datiers, tut para in zic pli pitschen e survesaivel. Igl è in'egliada che lascha nascher distanza – ed en il medem mument vischinanza. Cun tschai maun dat el ina salidada, el telefonescha, ri. Tut capita en il medem mument – senza perder il tact.
Passiun musicala
Il bainvegni quella damaun è avert e cordial. Cun fatscha rienta vegn la rauba chargiada. I n vegn betg targlinà: entrar, manar la clav e laschar rullar las rodas.
Dario Hess (32) da Tujetsch è camiunist e musicist. Durant l'emna da viadi sin via, la fin d'emna da chasa sin tribuna.
En moviment
En la cabina savuri da café nair e motor chaud. Ina savur che resta. Ord ils autpledaders rebatta musica da rock, AC/DC. La musica è dira, ma na disturba betg. Ella è plitost in'accumpagnadra, ina buna amia.
La via sa stenda per lung, gulivamain, fidaivlamain. Dario Hess discurra enten manar. El salida glieud che vegn encunter u ch'è a l'ur da la via – el è enconuschent. Ses maun s'auza savens dal guvernagl e quai tut da sez. «Ins s'enconuscha», di el e surriend.
Tranter discurs, traffic ed inscunters sa furma insatge agen. Nagin stress en il senn classic. Plitost in simpel esser. Sinaquai di el: «Sch'i rolla, lura rolli.»
El è in da quels ch'è savens da la partida, ch'è darar quiets, che tegna en moviment tut il medem mument. Ed el sa che quai na po betg adina gartegiar. «Forsa rolli bain», di el, «ma forsa èn ils frains magari betg uschè buns.» Ina construcziun che resta en l'aria, perquai ch'ella è dapli ch'ina descripziun – igl è in confess.
Dus munds
Durant l'emna: camiuns, concentraziun, via. La fin d'emna: tribuna, dad aut, suaditsch. «Jau na pos – u na dastg – betg cumparegliar quai», di Dario Hess. El lascha sentir che exact là - en il tranter - stat la fascinaziun.
En il camiun è el focusà. La via appartegn ad el, ils patratgs era. En tscherts muments dirigia mo il proxim tschancun en tge direcziun rullar.
Tranter quels munds stat la vischinanza. Quai che po esser nunditg bel, po era esser ina sfida.
Sch'jau faschess propi in scheiss, lura èn tuts che san quai e dian: Avais udì tge che quel che fa musica ha fatg?
Sin tribuna è tut auter. Pli dad aut. Criv. Direct. Rock'n'roll sco expressiun, betg sco defensiun. Pertge, motivs da propi esser in rebel n'hai mai atgnamain mai dà, di el. Creschì si en segirtad, en abundanza. E tuttina: «I giascha insanua en il carstgaun.»
Caos sco motor
«Adina vollgas», uschia descriva el sasez. In che sa malamain dir na. In che di: «Gea, faschain nus», senza patratgar, per pli tard realisar: i vegn stretg. Ils dis èn plains, il temp stgars. En il medem mument manegia el era dad esser caotics. Vesa dentant betg quai sco flaivlezza. El dovra il dischurden per laschar nascher insatge nov. Quai saja ina part da sia creativitad. Ina part ch'animescha da cuntinuar.
Era en il mintgadi vegn el percepì uschia. Collegas da lavur descrivan el sco «tip correct», «adina da buna luna», e «100 pertschient fidaivel». In, cun il qual ins po adina quintar, el è qua.
Creschì si a Tujetsch, ils geniturs piuniers regiunals en l'agricultura biologica. Tractar bain il mund – quest patratg è restà. E tuttina manegia el cun in chaud surrir: «Brischar diesel!»
Anavos tar las ragischs
Sin la dumonda, tge ch'el manegia da mammas che giavischassan in schender sco el, vegn el quiet. In lev surrir, bunamain schenà. «In cumpliment», di el. Betg dapli.
Il matg vegnent va el en il studio cun la Dario Hess Band per registrar in nov album. En il medem mument è gia il proxim project sin via – pli dir, pli direct, enavos tar las ragischs. Heavy metal sco l'entschatta e quai cun ina nova band: Lock O Motiv.
Plans a lunga vista? Chaschunan memia bler squitsch. «Simplamain far», manegia el. Il rest sa dat.
Il cumià, paucas uras pli tard, è uschia sco il bainvegni la damaun: sincer, betg cumplitgà cun cor avert. Ins va ord il camiun, stat puspè giu sin via. La perspectiva è daventada in'autra. Ni cun ils pleds da Dario Hess: I sto rullar.