Suenter curta discussiun sur da la finanziaziun han las radund 85 persunas preschentas approvà cleramain il project per la sanaziun dal Bogn Sedrun. Sco proxim vegnan ins ad inoltrar la dumonda da bajegiar e trair en tut las offertas. Uschia saja pussaivel da savair avant che cumenzar cun las lavurs quant che tut vegn a custar. Quai saja necessari per betg surpassar il credit, uschia il president communala Martin Cavegn. Da cumenzar cun las lavurs è planisà l’avrigl 2023. A fin duai alura tut esser sin il zercladur 2024. Plinavant ha la radunanza communala da Tujetsch era concedì il credit da 900’000 francs per la sanaziun da la staziun.
Gronda lavura preparatorica fin che project era madir
Radund tschintg onns ha la cumissiun preparatorica planisà ed examinà las variantas pussaivlas. Ch'i dovra ina sanaziun dal Bogn Sedrun è indispensabel, e la varianta planisada prevesa era da dar ina plivalur al bogn existent cun construir ina ruschnera. Impurtant saja numnadamain ch'i dettia en l'avegnir dapli entradas en il bogn per sminuir ils custs da manaschi, uschia in dals arguments. La finala n’ha il project sez betg dà da discutar, quel para propi dad esser madir da vegnir avant l’ultima instanza politica da la vischnanca da Tujetsch, avant la radunanza communala. Quella duai avair lieu il zercladur, gist cun in'infurmaziun per la populaziun en il Bogn Sedrun sez. Sco il president communal da Tujetsch Martin Cavegn ha ditg, per mussar a tuts interessads co l’infrastructura sa preschenta.
Tujetsch ha finanzas saunas
Per pudair survegnir ina segunda vista sin il project ha il parlament envidà a la sesida Giachen Caduff da l'Uffizi chantunal da vischnancas. En ina preschentaziun èsi lura vegnì mussà che la vischnanca da Tujetsch ha en cumparegliaziun cun la media chantunala in aut grad d’atgna finanziaziun (cash-flow). Era disponia la vischnanca da Tujetsch da pliras pitgas d’entrada, betg sulet las concessiuns d’aua portian daners. Era cun las atgnas ovras electricas «Energia Alpina» hajan ins in'entrada communala ch'autras vischnancas n’hajan betg, uschia Caduff. Uschia possian era investiziuns betg prevedidas tuttina vegnir fatgas – era sch’ils debits vegnan a crescher fitg cun questa investiziun. Tuttina mussia il scenari realistic, che la vischnanca possia purtar quests debits e la finala era reducir quels, han ditg Giachen Caduff ed il president communal Martin Cavegn.
Summa da 9,8 milliuns u tuttina 2,8 milliuns
La summa d’investiziun per la sanaziun munta a 9,8 milliuns francs, plus u minus 15%. Quai saja il credit contribuì dal cussegl communal. Ma ils ultims onns hajan ins gia fatg remessas da 4,2 milliuns francs, quels daners sajan avant maun e spetgan da vegnir investids, uschia Martin Cavegn. Era possian ins quintar cun ina summa da 2,5 milliuns francs da las ovras electricas «Energia Alpina». Cun la contribuziun a fond perdu dal chantun en connex cun la nova politica regiunala da 286’000 francs, resti la finala a la vischnanca ina summa da 2,8 milliuns francs.
Era vegnian ins uss a dumandar il chantun per in sustegn per infrastructura d’impurtanza regiunala. Qua pudess lura anc vegnir ina summa dad in milliun francs, uschia Martin Cavegn. Ma il project vegnia era realisà senza questa contribuziun. Sulet il consentiment da la radunanza da vischnanca manchia anc. Ina sfida vegn ad esser da savair gia avant che cumenzar quant che tut vegn a custar. Ins veglia tut las offertas sin maisa avant che cumenzar, era per pudair garantir ch’ils custs per material da construcziun na surpassian betg ils credits, uschia Martin Cavegn.
