Siglir tar il cuntegn

Header

cuntegn

Difficultad per butias Pliras stizuns en la citad da Glion han serrà lur portas

La vendita da rauba online remplazza per part la vendita en stizuns. L'effect sin las citads è ch'i dat pli pauc spazi commerzial. Er a Glion sa mida la vista da la via.

Sch’ins va quels dis tras il center da Glion lura vesan ins pliras vitrinas vidas, tge che munta en quels cas surfatschas da vendita vidas. Tge fatschentas che suondan en quels spazis n’è anc betg dapertut cler. Tar l’anteriura butia da Vögele Shoes vegn per exempel ina mesadad bajegiada or cun chombras per osps, tschella resta spazi per commerzi, sco il possessur ha confermà a RTR.

Oz ina butia vida, na vul betg dir che quella resta era damaun vida. Il privel exista ch’il spazi na vegn betg pli duvrà per la vendita en detagl, mabain per biros u insatge auter. Per las detaglistas dal center da Glion èsi er impurtant d'avair bleras butias per l'agen negozi.

Sch’i dat adina puspè davent ina butia vul quai dir che Glion è pli pauc attractiv, tge che munta in minus.
Autur: Esther Putzi mainafatschenta Maggi SA
audio
Muria da stizuns en il center da Glion
ord Actualitad dals 04.10.2022.
laschar ir. Durada: 4 minutas 7 Secundas.

Il center da Glion haja bler qualitads per la vendita en detagl, di Franca Strasser, la co-presidenta da l’Uniun da commerzi e mastergn Glion e conturn. Il center haja sin pitschen spazi bleras butias, saja survesaivel ed haja da porscher buns products, da la moda tar cudeschs enfin la ferramenta. Tge che manca al center da Glion saja ina qualitad da flanar. La zona da conduir 30 era en quel resguard gia in tema avant in pèr onns. En la diminuziun dal tempo vesa Franca Strasser potenzial per quella mira. D’ina vart saja la sfida per il futur d’attrair dapli glieud che giaja sper la citad ora en las surfatschas grondas a cumprar en. Da l’autra saja la purschida er per il turissem dal di anc da sviluppar.

Strusch pli butias da chalzers en Surselva

La butia da chalzers Vögele Shoes ha dacurt serrà sias portas a Glion. Cun ella svanescha la davosa butia che venda exclusivamain chalzers en la regiun. Igl è bain pussaivel da cumprar chalzers en stizuns da sport, ma in bel chalzer da tgirom ston ins ir a tschertgar. Quai n’è betg mo a Glion uschia, mabain en l’entira Surselva. Da Sedrun enfin Flem datti mo pli paucas stizuns ch'han auters chalzers che da quels da sport en il sortiment.

chalzers da tgirom per dunnas
Legenda: Ins anfla anc chalzers da tgirom en Surselva. RTR, FRANCO CAVIEZEL

La stizun Moda Decurtins porscha anc chalzers classics da tgirom a Glion. Tenor il mainafatschenta, Sascha Decurtins, sajan chalzers in accessori da moda. La glieud veglia cumprar chalzers cun la vestgadira, pia esser vestgida da chau a pe suenter ch’ella bandunia la stizun. Cun quest model da fatschenta ha Sascha Decurtins success. Er Dieter Spiess, il president d'onur da l’Associaziun svizra per la vendita da chalzers, conferma ch’ina fatschenta da chalzers stoppia, sch’ella veglia surviver, engrondir la purschida. Tgi che cumpria in bel vestgì veglia era il chalzer latiers.

audio
Sfida da cumprar chalzers en Surselva
ord Actualitad dals 04.10.2022.
laschar ir. Durada: 3 minutas 39 Secundas.

Er sch’il dumber da stizuns en la periferia sa reduceschia, di Dieter Spiess, vegnian in pèr paucas a star. E quellas stoppian tenor el avair in messadi, in sortiment che persvadia e surtut ina fitg buna cussegliaziun. Er en las citads pli grondas sajan buns vendiders e vendidras stgarsas. Dapi in pèr onns ha il commerzi online fatg concurrenza a las stizuns. Uss è lez er sut squitsch perquai che las consumentas ed ils consuments èn malsegirs. Actualmain è la situaziun geopolitica ed economia tendida, quai ch’ha in’influenza sin il cumportament da cumpra.

Serrar la stizun n’è betg simpel

Suenter 25 onns serran las moblias Fry lur filiala a Glion. Els hajan ditg tschertgà ina persuna per la vendita ma la finala chattà nagin. Lura saja la decisiun da serrar la filiala a Glion vegnida pli e pli madira, declera la manadra da fatschenta Geraldine Fry.

Geraldine Fry la mainafatschenta da mobilias Fry a Mustér.
Legenda: Geraldine Fry, la manadra da fatschenta da mobilias Fry a Mustér. RTR, Gionduri Maissen

Ma per mussar mobiglias saja la fatschenta a Glion memia pitschna e la vendita en l’internet s’augmentia ferm, perquai saja la decisiun da serrar era vegnida, schegea che simpla, na saja quella decisiun betg stada. La gronda part da la clientella che vegn en stizun a Glion deplorescha la decisiun, surtut ch’ina ulteriura stizun svanescha or dal maletg da la citad. Ma la clientella n’haja betg pli temp da vegnir en ina stizun e guardar ed empruvar, e la gronda part da la lavur saja lavur vi dal computer. La stizun a Mustér restia ed ella speria vinavant da pudair cusseglier avant lieu las clientas ed ils clients, perquai che gliez saja anc adina il pli bel, di Geraldine Fry.

audio
Mobilias Fry serran suenter plirs decennis
ord Actualitad dals 04.10.2022.
laschar ir. Durada: 2 minutas 51 Secundas.

Artitgels legids il pli savens

Scrollar a sanestra Scrollar a dretga