Siglir tar il cuntegn

Header

video
3 candidats per 1 sez – elecziuns a Flem
Or da Telesguard dals 18.09.2020.
laschar ir
cuntegn

Elecziun presidi communal Flem 3 candidats per 1 uffizi – il suveran ha ina vaira elecziun

Ch'i dat gist trais candidats per il presidi da Flem po esser in indizi che silmain ina part da la populaziun n’è betg cuntenta cun la situaziun actuala. Sper il president actual Adrian Steiger aspireschan er Martin Hug e Nicola Fantini per il post dal president communal.

L'actual: Adrian Steiger

Steiger è gia dapi otg onns en uffizi e vul vegnir elegì per la terza giada sco president communal. Quai è avantatg e dischavantatg en il medem mument. Persunalmain vesia el sia independenza sco ses pli grond avantatg, di Adrian Steiger sez.

Sut ses presidi è Flem sa drizzà economicamain pli fitg encunter Cuira che envers la Surselva. Cun quest svilup vuless Adrian Steiger cuntinuar en cas d’ina elecziun. Crititgà vegn il president actual cunzunt pervia da sia moda da communitgar.

portrait dad els dus.
Legenda: Adrian Steiger e Martin Hug (da san.) vulan omadus daventar president communal da Flem. RTR/ MAD

Quel ord l'economia: Martin Hug

Il segund candidat per il presidi da Flem è Martin Hug. El era ils davos 20 onns sco mainafatschenta tar l'Arena Alva a Laax. Sin la fin fanadur 2020 ha el abditgà quel post. Hug è fitg enconuschent a Flem. La vischinanza tar l'Arena Alva vegn giuditgada d’ina part dals da Flem sco problematica.

Tar in'elecziun vuless Martin Hug meglierar l'agir e la communicaziun entaifer la vischnanca da Flem.

Il newcomer: Nicola Fantini

Sco davos candidat è Nicola Fantini ì en la cursa per il presidi da Flem. Avant 15 onns era el vegnì per l’emprima giada sco giast da vacanzas a Flem. Dapi otg onns abitescha el là. El è il candidat cun ils pli pitschens fastitgs a Flem. Fantini lavura en il svilup da sistems d'informatica. En ses focus politic sajan ils problems actuals, che Flem haja da schliar. Tar in'elecziun veglia el reglar la situaziun enturn il Prau la Selva e la colliaziun da l'Arena tectonica.

Portrait dad el.
Legenda: Nicola Fantini è il newcomer en la publicitad a Flem. MAD

La prevista

Tant tar ils candidats per il presidi sco er tar la populaziun da Flem vegn quintà cun la pussaivladad che nagin dals trais candidats cuntanschia il pli absolut en l’emprim scrutini, uschia ch'i savess dar ina segunda votaziun per savair tgi che vegn president da Flem.

Ina tendenza, en tge direcziun ch'il suveran da Flem vul ir en l'avegnir, savess la votaziun dals 27 da settember tuttina gia mussar.

RTR actualitad 17:00

Artitgels legids il pli savens

Scrollar a sanestra Scrollar a dretga