Trais persunas pon vinavant restar en il gremi: per l'ina è il president communal, Maurus Caflisch, vegnì reelegì cun total 219 vuschs. Per l'autra po era Marco Capatt cuntinuar sco suprastant en il departament da construcziun. Er el è vegnì reelegì cleramain, quai cun 248 vuschs.
Be tar il post da suprastanza da Hans Jakob Telli hai dà in’elecziun da cumbat. Igl è stada ina cursa plitost stretga, ma la finala ha Hans Jakob Telli pudì defender ses post cunter ses cuntracandidat Lukas Kälin, ch'ha candidà per la glista «Ensemen per Trin» – quai cun 147 vuschs vers las 125 vuschs per Lukas Kälin. Cunquai resta Hans Jakob Telli il responsabel per il departament da l'economia publica a Trin.
Ma era duas fatschas novas èn vegnidas elegidas en la suprastanza. Carolin Tobler, ch'a survegnì 202 vuschs è da nov responsabla per il departament da scolaziun e cultura. E Patricia Spreiter è nov elegida – cun 200 vuschs – per il departament da segirezza.
Trin e ses sistem da suprastanza unic
A Trin vegnan las quatter suprastantas u suprastants elegids directamain sco manaders d'in departament. Quai vul dir ch'igl è d'eleger per exempel ina manadra u manader dal departament da construcziun, da l'economia publica, da scola u era ina suprastanta u suprastant responsabel per la segirezza. Quai è auter a Trin che en bleras autras vischnancas nua ch'i vegn elegì quatter suprastantas e suprastants che sa constitueschan tranter els e repartan ils departaments.
Duas demissiuns
A Trin avevi dà duas demissiuns en suprastanza. Da remplazzar èn stads Simon Schwarzenbach-Schurter, ch'ha manà il departament segirezza publica, ambient e planisaziun e Silvia Capatt, la manadra dal ressort scolaziun, cultura e temp liber. Vitiers è vegnì contestà il departament da l'economia publica, agricultura e selvicultura da Hans-Jakob Telli, numnadamain da Lukas Kälin che figurescha sin la glista «Ensemen per Trin».
«Ensemen per Trin»
La populaziun da Trin è creschida fitg ils davos decennis. Tenor Wikipedia è la populaziun da Trin creschida ils davos 25 onns da 1'100 sin bunamain 1'500 abitantas ed abitants. Tranter auter èn bleras famiglias giuvnas sa domiciliadas a Trin. En vista a las elecziuns communalas era sa furmada la glista «Ensemen per Trin» cun ina candidata ed in candidat per la suprastanza e cun ina candidatura per la cumissiun da quint e gestiun.
Sper Lukas Kälin èn era Patricia Spreiter e Tillmann Blauss stads candidats da la glista «Ensemen per Trin». Dus chavazzins che tuts trais candidats han duvrà è l'impurtanza da transparenza e d'infurmaziun.
«Ensemen per Trin» – ina provocaziun?
Sco Lukas Kälin ha ditg envers RTR na saja la gruppaziun betg ina provocaziun a l'adressa da la suprastanza. Quai duaja plitost esser in segn ed avrir ils egls per la malcuntentientscha che saja creschida il davos temp.
I pertutga surtut la communicaziun. Quella n'è betg adina stada transparenta.
In exempel: L’Arena alva ha – suenter blers onns – stritgà las favurs da pretsch per la vischnanca da Trin. Cunquai che Trin n’ha betg terra en il territori da skis, na vala la vischnanca betg pli sco indigena. Consequenza: ils e las da Trin ston pajar il pretsch cumplain per ir cun skis a Laax. La communicaziun da la suprastanza saja da lezzas uras stada fitg intransparenta, uschia la reproscha da Lukas Kälin.
Auter vesa quai il president Maurus Caflisch, per el sajan las reproschas ch’èn vegnidas si entras la gruppaziun «Ensemen per Trin» – che la suprastanza saja intransparenta – schon plitost ina provocaziun.
Bleras chaussas ch’èn vegnidas menziunadas èn mo la mesa vardad. Nagin è vegnì a discurrer cun nus ordavant ubain fatg propostas co ins pudess meglierar quella situaziun.
Cler, el saja pertschert ch’i saja na betg adina stà tut bun e tuttina hajan els investì bler temp e raps per meglierar quella situaziun, uschia il president Maurus Caflisch. Sin quai manegia Lukas Kälin ch’ils ins hajan empruvà da discurrer cun la suprastanza. Per part hajan els percepì quels discurs e per part forsa era memia pauc, sco el declera. Insacura resignesch’ins lura era, ma quai sajan tut emoziuns persunalas che hajan en la politica dal reminent nagin plaz.
Trin ha ussa ina nova suprastanza: i va vinavant
Schegea, chi saja stà in temp intensiv cun inqualas tensiuns, guarda il president Maurus Caflisch uss positiv en il futur.
Ins ha dà il maun ed ins ha gratulà. Gea, igl è sta in grev temp, ma ussa van ins vinavant.
Sche Lukas Kälin vul en trais onns anc ina giada candidar per il sez da Hans Jakob Telli che vegn lura liber, lez stat anc en las stailas.