En l'atun passà era la situaziun detg clera. Chattar candidatas e candidats per il presidi è grev. Il president actual da la vischnanca da Falera, Wendelin Casutt, ed il vicepresident, Maurus Candreja, han dumandà pliras persunas sch'ellas vulan succeder sco president communal. Mo quai han els fatg adumbatten.
Wendelin ed jau avain prendì la glista da tut ils abitants e silsuenter discurrì cun in pèr persunas. Nagin che vuleva surprender il post.
Pervia da quai ha la vischnanca furmà ina cumissiun da recrutaziun cun Maurus Candreja sco manader. En tut quinta la cumissiun otg commembers, tranter auter la suprastanza senza il president actual.
En in emprim pass è la cumissiun da recrutaziun sa dumandada co ins possia far reclama per il presidi communal, uschia Maurus Candreja. Silsuenter ha la cumissiun scrit ina brev a la glieud da Falera per far attent ella davart il problem e per appellar ad interessads da s'annunziar. Il resun da quella lavur eran tschintg annunzias d'interessents. Restadas èn duas, pia quellas da Norbert Good ed Alexander Jörger.
Nus avain emprendì che nus na pudain betg spetgar sin vischnanca enfin insatge s'annunzia.
In auter tema dal gremi è il model da gestiun per il futur presidi. La cumissiun preveda sper il president ina u in mainagestiun per la vischnanca da Falera. Quella persuna fiss responsabla per las fatschentas operativas, fertant ch'il president s'occupass vinavant da las incaricas politicas e strategicas.
