S'interessais vus forsa per ina «Barbalada savurusa da Danis», «Russers a la Monica» u «Buglia dad anghels da Breil»? En quest cas stuais Vus dar in'egliada en il nov cudesch da cuschinar da Fatmir Spescha. Il cuschinier da la chasa da vegls e da tgira Puntreis a Mustér publitgescha mez december 2025 sias 28 tratgas grischunas.
«Prender ina gronda e greva chazzetta da brassar e far vegnir brina lien la farina senza agiuntar grass. Truschar la farina l'entir temp, enfin ch'ella derasa ina savur decenta da nuschs. Agiuntar latg, paintg ed ina presa sal. Maschadar cun forza la massa, enfin ch'ella è spessa e fina.» Probablamain è quest recept enconuschent a bleras cuschinieras e cuschiniers en Surselva.
Servir e laschar mangiar la buglia arsa direct or da la chazzetta.
Fatmir Spescha numna il recept «Bugliarsa – scuvert da nov la tratga da buglia grischuna». Las persunas che vulan savair dapli tge che è nov vi da la buglia arsa da Fatmir Spescha ston consultar ses cudesch da cuschinar ch'è cumparì ils 12 da december e che porta il simpel titel «Tratgas grischunas».
Rezept per ils gnocs da charn cun pulenta da jogurt
Avrir la boxSerrar la box
800 g charn dal chalun da bov
150 g pulenta
0,2 cup jogurt
4 carottas grondas
200 g paintg
opziunal: ervas, agl ed ieli per marinar
Preparaziun:
Far coier las carottas enfin ch'ellas èn lomas, laschar sfradentar e tagliar en quadrels. Tagliar la charn da bov en quadrels mez gronds. Cuschinar la pulenta (sco quai ch'i stat sin il pac) durant circa 20 minutas. Stgaudar levamain il jogurt, maschadar en la pulenta e plazzar amez il taglier. Stgaudar la pischada en ina cazzetta e brassar lien ils quadrels da charn da bov, agiuntar ils quadrels da carottas e pinar cun precauziun sin la pulenta da jogurt.
Recept per la schuppa d'urticlas cun gnocs da charn
Avrir la boxSerrar la box
Per la schuppa
1 grond pugn plain urticlas giuvnas e finas
1 tschagula
1 l aua
1 dl groma
1 tg pischada
sal e paiver
Pils gnocs da charn
200 g pulaster, charn bov ni vadè
2-3 tg groma
sal
Per la bruschetta
4 talgias paun
2 tomatas
ieli d'ulivas
sal e paiver, ervinas frestgas
Preparaziun
Lavar bain las urticlas, tagliar grob la tschagula e scaldar tut en la pischada. Versar sur l'aua e laschar coier bain durant diesch minutas. Purar ed agiuntar la groma. Cundir cun sal e paiver – tegnair chaud.
Mixar fin la charn ensemen cun la groma e cun il sal. Furmar pitschens gnocs ed agiuntar a la schuppa per laschar trair lien enturn tschintg minutas. Scaldar curt il paun en furn sin 180°C. Tagliar en quadrels las tomatas e cundir cun ieli, sal, paiver ed ervas. Maschadar bain e repartir sin las talgias paun.
Recept per guaflas d'agl d'urs cun dip
Avrir la boxSerrar la box
Las guaflas
100 g paintg lom
100 g ieli
2 tp pulvra da levon
30 g sal
50 g agl d'urs manizzà fin
4 ovs
2 dl aua minerala
Per la pasta da guaflas maschadar tut las ingredienzas en ina stgadella e truschar bain durant 1 minuta.
Prestgaudar il fier da guaflas, metter in zic ieli sin las plattas ed unscher l'ieli cun palpiri da furnel sur las plattas, metter en la pasta e las laschar coier enfin ch'ellas èn melnas auradas.
Il dip
80 g quarc
1 presa sal
20 g agl d'urs manizzà fin
Per il dip maschadar il quarc, sal e l'agl d'urs. Tut tenor stagiun pon ins era pigliar pesto d'agl d'urs u agl d'urs schelà.
Finì e bun appetit!
Recept per paun da tartuffels cun menta
Avrir la boxSerrar la box
500 g tartuffels cotgs
500 g farina
42 g levon
1 tp zucher
160 ml aua
4 tg ieli
2 tp sal
10 g feglia da menta
Mundar ils tartuffels ed als coier loms en aua da sal ed als smatgar tras la pressa da tartuffels.
Dar la farina en ina stgadella gronda, smular lien il levon e maschadar bain cun il zucher e l'aua tievia. Agiuntar la menta tagliada fin, springir levet cun farina, cuvrir e laschar ir en in lieu chaud durant 10 minutas.
Lura agiuntarieli, sal e tartuffels e maschadar fitg bain (na sa lia la pasta betg, agiuntar in zic aua). Puspè cuvrir la pasta e laschar ir en in lieu chaud durant 1 ura.
Furmar il paun, sfarinar e metter sin ina lastra cun palpiri da furnel. Furar cun la furtgetta, cuvrir e laschar ruassar ulteriuras 20 minutas.
Lura en furnel e far cuir durant 40-50 minutas a 180°C. Laschar sfradar sin ina gradella, per ch'il funs na restia betg umid.
E bun appetit!
Tadlar cun bucca e nas
Igl è la segunda ovra ch'il schef da la cuschina en il Center da sanadad Puntreis a Mustér publitgescha. Là è Fatmir Spescha sa plazzà avant 7 onns suenter in viadi professiunal tras diversas cuschinas en la gastronomia turistica era en Surselva sco per exempel a Breil, Flem, Laax e Val Son Pieder.
Da las cussadentas e dals cussadents da la chasa da vegls e da tgira auda Fatmir Spescha era bler da la cuschina da pli baud. «Jau taidlel mintgamai cun bucca e nas», tradescha il cuschinier en l'introducziun da ses nov cudesch.
Legenda:
La buglia arsa survegn ina nova tempra dal cuschinier dal Center da sanadad Puntreis a Mustér.
Fatmir Spescha
Il cudesch da cuschinar cuntegna ils recepts da betg main che 28 diversas tratgas grischunas. Ils recepts tanschan dad avantpasts, schuppas, tratgas principalas, desserts e cuntegnan schizunt ina proposta da decorar. Sco quai ch'il cuschinier ha ditg envers la FMR, vul el mantegnair l'olma da las tratgas veglias e tuttina dar ad ellas ina nota contemporana e moderna.
Giavisch per tratgas pli levas
«Pli baud vegniva cuschinà cun bler grass e paintg e quai ch'era gist avant maun.» Fatmir Spescha di ch'ins stoppia cuschinar oz in zic pli lev. Per quest motiv dovra el per ses novs recepts era ingredienzas ch'eran pli baud betg uschè enconuschentas. Ils abitants da la chasa da tgira e da vegls n'èn dentant betg uschè attaschads a las novas creaziuns dal cuschinier, conceda Fatmir Spescha. El di che la cuschina dal Puntreis sa drizza als giavischs da la clientella per ina cuschina pli tradiziunala. «Nus discutain dentant bler en cuschina davart novas creaziuns.»
Legenda:
Il nov cudesch da cuschinar «Tratgas grischunas» da Fatmir Spescha.
RTR
Il cuschinier di ch'el stoppia sco emprim mintgamai persvader sia dunna cun sias propostas per dar in nov tratg a la cuschina grischuna tradiziunala. Che Fatmir Spescha è tuttavia attaschà a la tradiziun da la cuschina grischuna, tradescha era ses tip che pertutga la bugliarsa: «Servir e laschar mangiar la buglia arsa direct or da la chazzetta.»
