Siglir tar il cuntegn

Header

cuntegn

Enviern miaivel Avieuls activs e plantas cun brumbels a Mustér

A Mustér èn ils aviuels gia alerts. Raymond Schnoz, apicultur e controllader da l'Uffizi per la segirtad da victualias e per la sanadad d’animals dal chantun Grischun, reporta sur da ses pievels d’avieuls e l’activitad primavairila en la natira.

Jau sun stà il glindesdi tar mes avieuls, els sgolan ora ed èn activs e quai bler memia baud. Els portan gia en pollas, insatge uschia hai jau anc mai vis en il decurs dals 22 onns ch’jau sun apicultur.
Autur: Raymond Schnoz Apicultur

L'um da Mustér ha controllà ses pievels il glindesdi e constatà ch’i dat avieuls che sgolan gia ora. Quai fetschian els tar temperaturas da 9 fin 10 grads. In problem saja tenor Schnoz, che las temperaturas varieschan magari d'ura tar ura. Sco ch’i vegn fraid, dovran ils avieuls bia dapli energia e na pon betg pli returnar en masaina.

Da memia activitads en masaina

L’activitad dal pievel auza era l’activitad da la regina. Da miaivlas temperaturas metta lezza ovs ed il pievel ch’è sa furmà sco trocca entuorn ella, guarda da tegnair ina temperatura da circa 30 grads. Era quai va puspè vid las reservas d’energia.

Quai po effectar malsognas sco per exempel il cuvi asch. Ils apiculturs ston perquai controllar ils pievels e guardar ch’els hajan avunda da mangiar.
Autur: Raymond Schnoz Apicultur

Schnoz ha mess in kilo pasta sin ils viertgels da las masainas. Aschia spera el ch’ils avieuls han avunda da mangiar en liug e na ston betg sgular ora. L’enviern miaivel n'è anc betg exnum in privel per ils avieuls. Quai dentant mo sch'ils apiculturs gidian da surmuntar quest temp senza sbagls. Els duain controllar lur pievels senza disturbar da memia e na betg spargnar cun il pavel.

Era la fluriziun é gia levada or da la sien d’enviern

Tar intginas plantas pon ins gia observar brumbels – memia baud. Sch’i flurescha memia fitg da quest temp e la fradaglia vegn, pon las fluras schelar avant ch’ils avieuls vegnan da impollinar. Ussa saja anc memia baud da sgular ora per ils avieuls. Ideal fiss insanua tranter fin schaner e favrer per ch’i possian sesvidar.

RTR actualitad

Artitgels legids il pli savens