Il project per in nov hotel a Falera «La Mutta» va en la proxima fasa. Sco la vischnanca ha infurmà mesemna saira cumenzia uss la procedura da participaziun. Il president communal, Norbert Good, è cuntent ch'i giaja enavant cun il project.
Ins vesa la glisch a la fin dal tunnel.
Ils proxims 45 dis possian ils da Falera s'exprimer davart la nova planisaziun da l'areal e dal regruppament da terren. Il project concret dal bajetg na saja anc betg sin maisa. Lezza planisaziun suondia pir cura ch'il plan d'areal saja approvà. Sche tut giaja tenor giavisch pudess il nov hotel avrir sias portas en tschintg onns, ha ditg il president communal da Falera vinavant.
L'architect Gion Antoni Caminada ha preschentà la planisaziun directiva, pia co ch'il bajetg pudess vesair ora. Planisà è in bajetg cun duas allas. Ina part pli lunga en la direcziun encunter Laax cun bun 90 abitaziuns administradas e sin l'autra vart in bajetg envers il vitg da Falera cun bun 50 chombras d'hotel.
Visualisaziun dal project
-
Bild 1 von 8. Bildquelle: Gion A. Caminada.
-
Bild 2 von 8. Bildquelle: Gion A. Caminada.
-
Bild 3 von 8. Bildquelle: Gion A. Caminada.
-
Bild 4 von 8. Bildquelle: Gion A. Caminada.
-
Bild 5 von 8. Bildquelle: Gion A. Caminada.
-
Bild 6 von 8. Bildquelle: Gion A. Caminada.
-
Bild 7 von 8. Bildquelle: Gion A. Caminada.
-
Bild 8 von 8. Bildquelle: Gion A. Caminada.
Il 2022 han las votantas ed ils votants da Falera dà glisch verda per sviluppar il loschament «La Mutta». Il suveran aveva approvà unanimamain che la vischnanca cumpra terren per 1’171’000 francs. Quai vul dir ch'ella ha cumprà il terren necessari ed ha cedì quel en il dretg da construcziun ad ina societad da svilup. La societad, numnada «La Mutta SA» consista or da la vischnanca da Falera, l'Arena Alva e la firma da cussegliaziun Blauhut AG.
La radunanza aveva er approvà unanimamain che la vischnanca possia sa participar cun 102’000 francs a quella societad d'aczias. La Mutta SA è uschia vegnida fundada l'entschatta december 2022.
Segir è er che las abitaziuns vegnan vendidas. Ellas duessan vegnir nizzegiadas turisticamain, analog al «Rock Resort» a Laax. Tenor ils responsabels è la ristga finanziala per la vischnanca da Falera pitschna. La gronda cumpart dal chapital da ristga surpiglia l'Arena Alva cun 6 milliuns da 9,1 milliuns francs.
Il resort la Mutta è l'emprima etappa da plirs projects che duain suandar. Vinavant duess in parcadi sutterran vegnir realisà, ina nova pendiculara en il territori da l'Arena Alva ed ina colliaziun tranter il resort e la staziun sut da la pendiculara. Sche quai duess alura esser ina metro, na po anc nagin dir.